رەسەيدە ەكاتەرينبۋرگ تۇرعىنى كوشەدەگى ەلگە وق جاۋدىردى

نۇر- سۇلتان. قازاقپارات - رەسەيدىڭ ەكاتەرينبۋرگ قالاسىنىڭ حيمماش شاعىن اۋدانىندا ەر ادام حالىققا وق جاۋدىردى.

ىشكى ىستەر مينيسترلىگىنىڭ سۆەردلوۆ وبلىسى بويىنشا باسپا ءسوز قىزمەتىنىڭ باستىعى ۆالەري گورەلىح ت ا س س اگەنتتىگىنە بەرگەن مالىمەتىندە وقيعا سالدارىنان قىز بەن كۇزەت قىزمەتكەرى زارداپ شەككەنىن راستادى، دەپ حابارلايدى قازاقپارات.

«بۇگىن پوليسياعا بورودين كوشەسىندەگى ۇيلەردىڭ بىرىندە وق اتىلعانى تۋرالى اقپارات ءتۇستى. وقيعا ورنىنا دەرەۋ جەدەل ارەكەت ەتۋ توبى جەتىپ، ماڭايدى قورشاۋعا الدى. تۇرعىنداردىڭ ءبىرى تەرەزەدەن وق اتقانى بەلگىلى بولدى. سالدارىنان قىز بالا مەن روسگۆارديا قىزمەتكەرى جاراقات الدى. ولارعا مەديتسينالىق كومەك كورسەتىلەدى»، - دەدى ۆالەري گورەلىح.

سۆەردلوۆ وبلىسىنىڭ دەنساۋلىق ساقتاۋ مينيسترلىگى توتەنشە جاعداي سالدارىنان ەكى ادامنىڭ وق جاراقاتىن العانىن راستادى. ۆەدومستۆونىڭ مالىمەتىنشە، ەر ادام №36 تراۆماتولوگيالىق اۋرۋحانادا ورتاشا اۋىر حالدە جاتىر.

«قىزدىڭ جاعدايى وتە اۋىر، №9 قالالىق كلينيكالىق بالالار اۋرۋحاناسىنا جاتقىزىلدى»، - دەپ تولىقتىردى ايماقتىق دەنساۋلىق ساقتاۋ مينيسترلىگىنىڭ باسپا ءسوز قىزمەتى.

اتىس بولىپ جاتقان ءۇيدىڭ تۇرعىندارى قاۋىپسىز جەرگە كوشىرىلىپ جاتىر. ءۇيدىڭ اينالاسى قورشالعان..