اسكەريلەر ءۇشىن قانداي باسپانا تولەمدەرى قاراستىرىلعان؟

نۇر-سۇلتان. قازاقپارات - جاۋىنگەرلەردى پاتەرگە ورنالاستىرۋ باس باسقارماسى تۇرعىن ءۇي باسقارماسىنىڭ وكىلى، ادىلەت پودپولكوۆنيگى داۋرەنبەك جۇمابەك اسكەري قىزمەتشىلەر تۇرعىن ۇيمەن قالاي قامتاماسىز ەتىلەتىنىن ايتتى، دەپ حابارلايدى قازاقپارات.

داۋرەنبەك جۇمابەك 2018-جىلى تۇرعىن ءۇي زاڭناماسى وزگەرتىلگەننەن كەيىن اسكەري قىزمەتشىلەردى تۇرعىن ۇيمەن قامتاماسىز ەتۋ قانشالىقتى جاقساردى دەگەن سۇراققا جاۋاپ بەردى.

«ەنگىزىلگەن تۇزەتۋلەر اسكەري قىزمەتشىلەردىڭ الەۋمەتتىك جاعدايىن جاقسارتقانى ءسوزسىز. باعدارلاما وزگەردى، ءبىز قىزمەتتىك تۇرعىن ءۇي بەرىپ قانا قويماي، ولاردىڭ جەكە ارنايى شوتىنا تۇرعىن ءۇي تولەمدەرىن اۋدارا باستادىق. ەندى اسكەري قىزمەتشىلەر تۇرعىن ءۇيدى جەكە مەنشىككە نەمەسە جالعا الۋ قۇقىعىن پايدالانا الادى. 2018-جىلدان باستاپ ەنگىزىلگەن تۇزەتۋلەردەن باستاپ جەتى مىڭنان استام اسكەري قىزمەتشى مەنشىگىنە تۇرعىن ءۇي ساتىپ الدى. جەكەشەلەندىرۋ قۇقىعىمەن سالىستىرعاندا بۇل الدەقايدا كوپ»، - دەپ اتاپ ءوتتى ول قورعانىس مينيسترلىگىنىڭ اپتا سايىنعى ونلاين-بريفينگىندە.

ونىڭ ايتۋىنشا، بۇرىن اسكەري قىزمەتشىلەر جىل سايىن شامامەن 400 پاتەردى جەكەشەلەندىرە الاتىن.

«ءبىز ولاردى بىردەن پاتەر ساتىپ الۋعا مىندەتتەمەيمىز. پاتەر تاڭداۋىنا، ۇيلەنىپ، وتباسىن كەڭەيتۋىنە ۋاقىت بەرىلەدى. بۇل كەزدە تۇرعىن ۇيگە اقشا جيناقتاي الادى. ءتىپتى يپوتەكانى راسىمدەمەي-اق جيناۋىنا بولادى»، - دەپ ءتۇسىندىردى داۋرەنبەك جۇمابەك.

ول جاۋاپسىز قۇرىلىس مەردىگەرلەرىنە تاپ بولعان اسكەري قىزمەتشىلەردىڭ پروبلەماسىنا دا توقتالدى.

«اسكەري قىزمەتشىلەر ساتىپ الاتىن تۇرعىن ءۇيدى ءوز بەتىنشە تاڭدايتىنىن ەسكەرسەك، شىن مانىندە وسىنداي قۇرىلىس سالۋشىلارعا تاپ بولۋى مۇمكىن. زاڭ جۇزىندە ولار مەردىگەردەن اقشانى بانككە قايتارۋدى تالاپ ەتە وتىرىپ، اراداعى كەلىسىمشارتتى بۇزا الادى. بۇل رەتتە ولار تۇرعىن ءۇي تولەمدەرىن پايدالانۋ ماقساتىن دا وزگەرتە الادى، ياعني باسقا تۇرعىن ءۇيدى تاڭداعانعا دەيىن اي سايىن پاتەر جالداۋعا اقشا بەرىلەدى»، - دەدى داۋرەنبەك جۇمابەك.