شارىن شاتقالىنداعى قايعىلى وقيعا: وقۋشى مەن مۇعالىم قازا بولدى، ءىز-ءتۇزسىز جوعالعان وقۋشى قىز تابىلدى

نۇر-سۇلتان. قازاقپارات - ق ر ءبىلىم جانە عىلىم مينيسترلىگى شارىن شاتقالىندا ورىن العان قايعىلى وقيعادان قازا تاپقانداردىڭ وتباسىنا كوڭىل ايتتى، دەپ حابارلايدى قازاقپارات ءتىلشىسى.

«كەشە شارىن شاتقالىندا قايعىلى وقيعا ورىن الدى. وكىنىشكە وراي، كەلىپ تۇسكەن اقپاراتقا سايكەس، ەكسكۋرسياعا بارعانداردىڭ اراسىندا الماتى قالاسىنداعى №199-گيمنازيانىڭ 8-وقۋشىسى بولعان. ولاردى 5 اتا-انا مەن 3 مۇعالىم ەرتىپ جۇرگەن. قايعىلى وقيعا سالدارىنان 1 وقۋشى مەن بەيىندىك ءپان مۇعالىمى كوز جۇمدى، تاعى ءبىر وقۋشىنى ىزدەۋ جۇمىستارى جالعاسىپ جاتىر. قازا بولعانداردىڭ وتباسىلارىنا قايعىلارىنا ورتاقتاسىپ، كوڭىل ايتامىز جانە زارداپ شەككەندەردىڭ تەزىرەك ساۋىعىپ كەتۋىن تىلەيمىز»، - دەلىنگەن مينيسترلىك اقپاراتىندا.

سونىمەن قاتار ۆەدومستۆو اتا-انالار مەن مۇعالىمدەرگە ساپارعا شىققان كەزدە بارىنشا ساق بولۋ كەرەكتىگىن ەسكەرتەدى.

«وقۋ جىلى اياقتالعان كەزدە مۇعالىمدەر مەن اتا-انالار ءوز ساپارلارىن جوسپارلاپ قويعان بولار. وسى رەتتە وزدەرىڭىزگە جانە بالالارىڭىزعا ساق بولۋلارىڭىزدى سۇرايمىز. مۇمكىندىگىنشە اباي بولىپ، بالالارمەن دەمالۋعا نە ەكسكۋرسياعا بارعاندا، سۋ قويمالارىنا تۇسپەگەنىڭىز ابزال. سونىمەن بىرگە قاۋىپتى ايماقتارعا جاقىنداماي، ءاردايىم بالالارىڭىزدىڭ جانىندا بولىڭىزدار. ويتكەنى ءسىزدىڭ ءومىرىڭىز بەن اماندىعىڭىزدان قىمبات ەشتەڭە جوق»، - دەپ ەسكەرتەدى ءبىلىم مينيسترلىگىنەن.

شارىن شاتقالىندا جۇرگەن سەل سالدارىنان ءىز-ءتۇزسىز جوعالعان وقۋشى قىز تابىلدى.

«شارىن شاتقالى» قىزمەتكەرلەرى شارىن وزەنىنىڭ بويىن جاعالاي جەر بەتىندە ىزدەۋ- قۇتقارۋ جۇمىستارىن جۇرگىزۋ بارىسىندا ساعات 09-34-تە 2010 -جىلى دۇنيەگە كەلگەن قىزدى تاپتى. ول شارىن وزەنىنىڭ سول جاعالاۋىندا وقيعا ورىن العان جەردەن 3-4 شاقىرىم قاشىقتىقتا بولعان. قازىرگى ۋاقىتتا رەسپۋبليكالىق جەدەل قۇتقارۋ وتريادى مەن الماتى وبلىستىق توتەنشە جاعدايلار دەپاراتامەنتىنىڭ جەدەل قۇتقارۋ ءبولىمىنىڭ قۇتقارۋشىلارى دارىگەرگە دەيىنگى العاشق مەديتسينالىق كومەك كورسەتۋدە»، - دەدى رەسمي وكىل. ونىڭ اتاپ وتۋىنشە، زارداپ شەككەن وقۋشى قىزعا مەديتسينالىق كومەك كورسەتۋ ءۇشىن «قازاۆياقۇتقارۋ» ا ق-نىڭ اۆياتسيالىق تەحنيكاسىمەن الماتى قالاسىنىڭ اۋرۋحانالارىنىڭ بىرىنە جەتكىزۋ ماسەلەسى شەشىلىپ جاتىر.

ەستەرىڭىزگە سالا كەتسەك، كەشە الماتى وبلىسىنىڭ شارىن شاتقالىندا سەل ءجۇرىپ، 2 ادام مەرت بولىپ، 1 ادام ءىز-ءتۇزسىز جوعالعانى، تاعى 6 ادام زارداپ شەككەنى حابارلانعان بولاتىن. ال بۇگىن ەلىمىزدىڭ ءبىلىم جانە عىلىم مينيسترلىگى اتالعان وقيعا سالدارىنان 1 وقۋشى مەن 1 مۇعالىمنىڭ قازا تاپقانىن، تاعى ءبىر وقۋشىنى ىزدەۋ جۇمىستارى جۇرگىزىلىپ جاتقانىن ءمالىم ەتكەن ەدى.