شارىن شاتقالىندا سەل ءجۇرىپ، ەكى ادام مەرت بولدى - فوتو
الماتى وبلىستىق ت د ج باسپا ءسوز قىزمەتى تاراتقان حابارلامادا، كوز جۇمعان ادامنىڭ ءبىرى كامەلەتتىك جاسقا تولماعان جاس ءوسپىرىم ەكەندىگى ايتىلادى.
«29-مامىر كۇنى كۇندىزگى ساعات 13:35 شاماسىندا شارىن شاتقالىندا سەل ءجۇرىپ ەكى ادامنىڭ مەرت بولعانى جونىندە حابارلاما ءتۇستى. ونىڭ بىرەۋى كامەلەتتىك جاسقا تولماعان ءجاسوسپىرىم. زارداپ شەككەندەرگە جەدەل تۇردە مەديتسينالىق كومەك كورسەتىلدى»، - دەپ مالىمدەدى اتالمىش دەپارتامەنتتىڭ باسپا ءسوز قىزمەتى.
رەسمي اقپاراتقا سايكەس، قازىر وقيعا ورنىندا 31 قۇتقارۋشى، 8 تەحنيكا جانە جەدەل جاردەمنىڭ 4 كولىگىمەن 6 قىزمەتكەرى جۇمىس ىستەپ جاتىر.
«وسى 87282220213، 220218 نومىرلەر بويىنشا ارنايى جەلى قوسىلعان. قاجەتتى پسيحولوگيالىق كومەك كورسەتىلۋدە»، - دەپ تولىقتىردى باسپا ءسوز قىزمەتى. سەل جاۋىن سالدارىنان جۇرگەن. تاعى ءبىر ادام ءىز-ءتۇزسىز جوعالعان. قازىر ىزدەستىرۋ جۇمىستارى ءجۇرىپ جاتىر.
اۆتور: سامال قابىشەۆا
