استانالىق پوليتسەيلەر كىسى ولتىرگەنى ءۇشىن ىزدەۋدە جۇرگەن كۇدىكتىنى قولعا ءتۇسىردى - ۆيدەو
نۇر-سۇلتان قالاسى پوليتسيا دەپارتامەنتىنىڭ حابارلاۋىنشا، ۇستالعان ازامات 31 جاستاعى استانالىق تۇرعىندى ءولتىردى دەپ ايىپتالىپ وتىر.
«2017 -جىلدىڭ جەلتوقسان ايىندا مارقۇم دەنە جاراقاتتارىمەن قالالىق اۋرۋحاناعا جەتكىزىلگەن بولاتىن. قىلمىس تۇنگى كلۋبتاعى توبەلەس كەزىندە جاسالعانى انىقتالدى. كۇدىكتى ويىن-ساۋىق مەكەمەسىندە ساعات 05.30-دا جابىرلەنۋشىنى پىشاقتاپ، قاشىپ كەتكەن. وسى ۋاقىتتان باستاپ ول رەسەي اۋماعىندا جانە قازاقستاننىڭ شالعاي ايماقتارىندا جاسىرىنىپ ءجۇردى. كۇدىكتى نۇر-سۇلتاندا ۇستالدى»، - دەپ جازادى پوليتسيانىڭ باسپا ءسوز قىزمەتى. كۇدىكتىنى ۇستاۋ وپەراتسياسى قابانباي باتىر كوشەسىندەگى جالدامالى پاتەردە وتكەن. بۇرىن دا سوتتى بولعان 41 جاستاعى كۇدىكتى نۇر-سۇلتان قالاسىنىڭ تەرگەۋ يزولياتورىنا قامالدى. تەرگەۋ امالدارى جۇرگىزىلىپ جاتىر.
اۆتور: ەسىمجان ناقتىباي
