الماتىدا اسكەري تەحنيكانى جوندەيتىن ورتالىق ىسكە قوسىلدى

الماتى. قازاقپارات - الماتىداعى قارۋ-جاراق پەن اسكەري-تەحنيكانى ساقتاۋ جانە جوندەۋ بازاسىندا جوندەۋ تسەحى پايدالانۋعا بەرىلدى، دەپ حابارلايدى قازاقپارات قورعانىس مينيسترلىگىنىڭ باسپا ءسوز قىزمەتىنە سىلتەمە جاساپ.

«بۇل - قازاقستان قارۋلى كۇشتەرى تاريحىنداعى وق اتۋدى باسقارۋ جۇيەسىن، اتىس قۇرالدارىن، كۇش قوندىرعىسىن، ءجۇرىس بولىگىن جانە ارنايى ەلەكتر جابدىقتارىن قوسا العاندا، بروندى تانك تەحنيكاسى مەن زىمىران-ارتيللەريالىق قارۋ-جاراققا كەشەندى جوندەۋ جۇرگىزە الاتىن العاشقى سەح. ونى ىسكە اسىراتىن قاجەتتى قۇرىلعىلارى مەن وندىرىستىك قۋاتى بار مامانداندىرىلعان ۋچاسكەلەرى جانە ءتورت پوست بار»، دەلىنگەن حابارلامادا.

سەحتىڭ قۇرىلىمىن جوبالاۋ جانە قۇرۋ پولكوۆنيك اسىلبەك ساتىبالدينوۆتىڭ باسشىلىعىمەن تىل جانە قارۋ-جاراق باستىعى باسقارماسىنىڭ باستاماسىمەن جانە تىكەلەي قاتىسۋىمەن ورىندالعان.

اتالعان وبەكتىنىڭ اۋماعى 900 شارشى مەتر. ول رەسەي، گەرمانيا جانە قىتايدان اكەلىنگەن سوڭعى ۇلگىدەگى دياگنوستيكالىق، كوتەرگىش، دانەكەرلەۋ، مونتاجداۋ جابدىقتارىمەن جابدىقتالعان.

قارۋلى كۇشتەردىڭ جوعارى بىلىكتى ماماندارى - اسكەري بولىمدەردە دە، اسكەري زاۋىتتاردا دا جان-جاقتى جۇمىس تاجىريبەسى بار اسكەري قىزمەتشىلەر مەن ازاماتتىق پەرسونال جوندەۋ جۇمىستارىن اتقارادى.

«شتاتتىق اسكەري بولىمشەلەردىڭ كۇشىمەن جوندەۋ جۇرگىزۋ ەڭ الدىمەن جوعارى جاۋىنگەرلىك ازىرلىكتى قامتاماسىز ەتۋگە مۇمكىندىك بەرەدى. تەحنيكا قىسقا مەرزىمدە جەدەل تۇردە قالپىنا كەلتىرىلەدى. مىسالى، تانكتى جوندەۋ جۇمىسىنىڭ كۇردەلى بولۋىنا بايلانىستى ءبىزدىڭ ماماندار ونى 10-15 كۇندە جوندەي الادى. سونداي-اق، بۇل بيۋجەت قاراجاتىن ايتارلىقتاي ۇنەمدەيدى. ال زاڭناماعا ەنگىزىلگەن وزگەرىستەر قابىلدانىپ، قورعانىس مينيسترلىگى قوسالقى بولشەكتەر مەن جيىنتىقتاردى ءوز بەتىنشە ساتىپ الادى. بۇل ءبىزدىڭ جۇمىسىمىزدى جىلدامداتادى»، - دەپ ءتۇسىندىردى تىل جانە قارۋ-جاراق باستىعى اسىلبەك ساتىبالدينوۆ.

قورعانىس ءمينيسترى نۇرلان ەرمەكبايەۆ سەحتى ارالاۋ بارىسىندا باسقا وڭىرلەردە دە وسىنداي «قىزمەت كورسەتۋ ورتالىقتارىن» اشۋ ماسەلەسىن پىسىقتاۋ قاجەتتىگىن اتاپ ءوتتى.

بۇل اسكەري تەحنيكانىڭ جاۋىنگەرلىك ازىرلىگىن قاجەتتى دەڭگەيدە ۇستاۋدى قامتاماسىز ەتەدى، قارۋ-جاراقتى جوندەيتىن ورىندارعا تاسىمالداۋعا كەتەتىن ۋاقىت پەن شىعىندى ازايتادى.

سونداي-اق قورعانىس ۆەدومستۆوسىنىڭ باسشىسى تىل جانە قارۋ-جاراق باسقارماسىنىڭ سوڭعى جىلى جۇرگىزگەن اۋقىمدى جۇمىسىن ايتتى.

اتاپ ايتقاندا، اسكەري قىزمەتشىلەر ءۇشىن ازىق-تۇلىك ۇلەسىنىڭ قۇنىن ارتتىرۋ ماسەلەسى شەشىلدى. اسكەري نىساندى جەتىلدىرۋ بويىنشا جۇمىستار جۇرگىزىلىپ جاتىر. ۇزاق جىلدار ىشىندە العاش رەت اسكەري مۇلىككە تولىق تۇگەندەۋ جۇرگىزىلدى. پايدالانىلمايتىن اسكەري مۇلىك ودان تۇسكەن قاراجاتتى وتكىزۋ، سونداي-اق ونى ەل بيۋجەتىنە جىبەرۋ ءۇشىن ۋاكىلەتتى ورگانعا بەرىلەدى.