رەسەيمەن بايلانىسىمىز كەڭەستىك وقۋلىقتاردا جازىلعاننان الدەقايدا تەرەڭ - داۋرەن ابايەۆ

نۇر-سۇلتان. قازاقپارات - التىن وردا - وتكەن تاريحىمىز عانا ەمەس، ول ەڭ الدىمەن، بۇگىنىمىز بەن بولاشاعىمىز.

پرەزيدەنت اكىمشىلىگى جەتەكشىسىنىڭ ءبىرىنشى ورىنباسارى داۋرەن ابايەۆ ۇلتتىق اكادەميالىق كىتاپحانادا وتكەن حالىقارالىق كونفەرەنسيادا وسىنداي پىكىر ءبىلدىردى، دەپ حابارلايدى قازاقپارات ءتىلشىسى.

«ءبىزدىڭ كورشىلەس رەسەيمەن ەكىجاقتى بايلانىسىمىزدىڭ تاريحى كەڭەستىك وقۋلىقتاردا جازىلعان كەزەڭنەن گورى تىم تەرەڭ ەكەنىن ايتقىم كەلەدى. ول، كەمىندە، XIII عاسىردا جوشى ۇلىسى اتتى يمپەريالىق مەملەكەتتىڭ اياسىندا باستالعان»، - دەدى ول «ۇلىق ۇلىس - التىن وردا: باستاۋى، تاريحى جانە مۇراسى» اتتى حالىقارالىق عىلىمي- تاجىريبەلىك كونفەرەنسيادا.

پرەزيدەنت اكىمشىلىگىنىڭ وكىلى ەۋرازيا كەڭىستىگىندەگى مەملەكەتتەرگە التىن وردا وركەنيەتىنەن قانداي مۇرا قالعانىنا دا توقتالدى.

«ءبىرىنشى - ورتالىقتان باسقارىلاتىن مەملەكەت. ۇلىق ۇلىستىڭ تاريحي تاجىريبەسى وسىنى كورسەتكەندەي، تابيعاتى قاتال، اۋماعى ۇلكەن ەۋرازيا قۇرلىعىنىڭ كەڭىستىگىندە مىقتى «بيلىك ۆەرتيكالى» ارقىلى ورتالىقتان باسقارىلاتىن مەملەكەت قانا ءوسىپ- وركەندەيدى. وسى ماڭىزدى شارت جوشى ۇلىسىنىڭ «التىن عاسىرىن» تۋعىزدى. ەكىنشى - مەريتوكراتيا. التىن وردا مەملەكەتى مەن قوعامىنىڭ ماڭىزدى ەرەكشەلىگىنىڭ ءبىرى - ادامداردى ەليتا قاتارىنا جەكە قاسيەتىنە قاراپ قوستى. قارىم- قابىلەتىنىڭ ارقاسىندا قاراپايىم جىگىتتەن اۋەلى باتىر، ودان سوڭ بي، كەيىننەن التىن وردانىڭ بەكلەربەگىنە اينالعان ەدىگەنىڭ عۇمىرى وسىعان انىق دالەل. بۇگىندە مەملەكەتىمىز مەريتوكراتيانىڭ باستى قاعيداسىن جۇزەگە اسىرىپ جاتىر. ونسىز قوعامنىڭ جاڭعىرۋى مەن دامۋى مۇمكىن ەمەس»، - دەدى داۋرەن ابايەۆ.

اۆتور: ەسىمجان ناقتىباي