ۆاكسيناتسيا كوروناۆيرۋستىڭ اۋىر تۇرىنەن قورعايدى - مامان پىكىرى
بۇل تۋرالى ق ر د س م «قوعامدىق دەنساۋلىق ساقتاۋ ۇلتتىق ورتالىعى» ش ج ق ر م ك سانيتاريالىق- ەپيدەميولوگيالىق ساراپتاما جانە مونيتورينگ عىلىمي- پراكتيكالىق ورتالىعىنىڭ دارىگەر- ەپيدەميولوگى لەنا قاسابەكوۆا ايتتى، دەپ حابارلايدى قازاقپارات ءتىلشىسى.
«كوروناۆيرۋس ينفەكسياسىنا قارسى ۆاكسيناتسيا بۇكىل الەمدە، ونىڭ ىشىندە ءبىزدىڭ رەسپۋبليكامىزدا وتە وزەكتى پروبلەما بولىپ تۇر. ءبىزدىڭ مىندەتىمىز - قازىرگىدەي قاتە ءارى تەرىس اقپاراتتار ۋشىعىپ تۇرعان ساتتە «ەكپە الۋ كەرەك پە، كەرەك ەمەس پە» دەگەن ماسەلەدە حالىقتىڭ دۇرىس شەشىم قابىلداۋىنا كومەك كورسەتۋ»، - دەدى ول ورتالىق كوممۋنيكاتسيالار قىزمەتىندەگى باسپا ءسوز ءماسليحاتى بارىسىندا.
ونىڭ اتاپ وتۋىنشە، بۇگىندە حالىقتىڭ باسىم بولىگىنىڭ تىم بولماعاندا ۆاكسينانىڭ ءبىرىنشى كومپونەنتىن الۋى ماڭىزدى.
«بۇكىل الەمدە ۆاكسينا تاپشىلىعى بايقالاتىندىعىن بارلىعى بىلەدى. ءبىراق، وسىعان قاراماستان ەلىمىزدىڭ تۇرعىندارىنا ۆاكسينانىڭ ءۇش ءتۇرى قولجەتىمدى بولىپ تۇر. ءبىز ءۇشىن حالىقتىڭ بارىنشا ۆاكسينا العانى ماڭىزدى. ال جاقسى يممۋنيتەت قالىپتاسۋى ءۇشىن ۆاكسينانىڭ ەكىنشى كومپونەنتىن الۋ ماڭىزدى. ۆاكسيناتسيا كوروناۆيرۋس ينفەكسياسىنان قورعاۋعا كەپىل بولا المايدى. ۆاكسينا الىپ، ەندىگى ۋاقىتتا «تولىقتاي قورعالدىم» دەپ جۇرگەن ادامدارعا مۇنىڭ دۇرىس ەمەس ەكەندىگىن ايتقىم كەلەدى. ادام ەكپە السا دا بۇل ۆاكسينادان 100 پايىز قورعالمايدى. ۆاكسيناتسيا كوروناۆيرۋستىڭ اۋىر تۇرىنەن، ءولىم- جىتىمنەن قورعايدى. ءتىپتى ەكپە العان ادامنىڭ ءوزى دە اۋىرىپ قالىپ، ودان ارى سول ۆيرۋستى تاراتۋشى بولۋى مۇمكىن»، - دەدى لەنا قاسابەكوۆا.
اۆتور: مارلان جيەمباي
