«قازاقپارات» رەداكتورى «ءبىز - باقىتتى وتباسىمىز» بايقاۋىندا جۇلدە الدى

نۇر- سۇلتان. قازاقپارات - قازاقپارات - «استانا دارىنى» دارىندىلىقتى دامىتۋ جانە پسيحولوگيالىق سۇيەمەلدەۋ ورتالىعىنىڭ ۇيىمداستىرۋىمەن حالىقارالىق وتباسى كۇنىنە وراي «ءبىز - باقىتتى وتباسىمىز» اتتى قالالىق بەينەروليكتەر بايقاۋىنىڭ جەڭىمپازدارى ماراپاتتالدى، دەپ حابارلايدى ەلوردا اكىمدىگىنىڭ رەسمي سايتى.

تاۋەلسىزدىكتىڭ 30 جىلدىعىنا وراي ۇيىمداستىرىلعان بايقاۋعا وقۋشىلار مەن ولاردىڭ اتا- انالارى قاتىستى. كونكۋرسقا نۇر- سۇلتان قالاسىنىڭ مەكتەپكە دەيىنگى مەكەمەلەرىنەن 16، مەكتەپتەردەن 71، كوللەدجدەردەن 13، بارلىعى 90 وتباسى قاتىستى.

«بۇكىل الەمدى جايلاعان پاندەميا كەزەڭىنىڭ العاشقى كەزدەرى بارىمىزگە اۋىر بولعانى راس. ءبىز سول قيىن- قىستاۋ كەزدە اتا- انالارمەن جۇمىس جۇرگىزىپ، ونلاين تۇردە سەمينارلار وتكىزىپ تۇردىق. بىلتىردان بەرى ءتۇرلى وتباسىلارمەن جۇمىس ىستەپ، قاشىقتان بايلانىس جاساۋ ارقىلى وسى سايىستى قولعا العان بولاتىنبىز. ول كەزدە 17 وتباسى قاتىستى. بۇل باستامامىز وتە جاقسى قولداۋ تاۋىپ، بيىل سايىسقا 90 وتباسى قاتىسۋدا. سول 90 وتباسىنىڭ ىشىنەن وزا شاپقانىن انىقتاپ، بارلىق كريتەري بويىنشا ساراپتاعان كەزدە 32 ۇزدىك بەينەروليكتى تاڭداپ الدىق. ولاردىڭ ىشىندەگى 10 وتباسىن بۇگىنگى ماراپاتتاۋ راسىمىنە شاقىردىق. وتان — وتباسىنان باستالادى. بيىل - تاۋەلسىزدىگىمىزگە 30 جىل. مەملەكەتىمىز مىقتى بولىپ، وركەندەپ دامۋىنا ءاربىر وتباسىنىڭ ۇلەسى بار دەپ ويلايمىن. سەبەبى وتباسى — شاعىن مەملەكەت. ءاربىر وتباسى باقىتتى بولۋعا لايىقتى»، — دەدى «استانا دارىنى» دارىندىلىقتى دامىتۋ جانە پسيحولوگيالىق سۇيەمەلدەۋ ورتالىعى ديرەكتورىنىڭ ورىنباسارى گۇلباقىت بۋرالكيەۆا.

قاتىسۋشىلار بەرىلگەن ۋاقىت ىشىندە وتباسىلىق قۇندىلىقتار مەن داستۇرلەردى، وتباسى ىنتىماقتاستىعىن، مادەنيەتتى قارىم- قاتىناستى كورسەتە بىلگەن. قازىلار القاسى قاتىسۋشىلاردىڭ بەينەروليكتەرىن باعالاۋ كريتەريلەرى ارقىلى ىرىكتەپ، كونكۋرستىڭ جەڭىمپازدارى مەن جۇلدەگەرلەرىن «ءداستۇر ۇيىتقىسى وتباسى»، «انشىلەر وتباسى»، «ەڭبەكقور وتباسى»، «سپورتشى وتباسى»، «ونەرلى وتباسى»، «كرەاتيۆتى وتباسى»، «مەرەيلى وتباسى» سەكىلدى ءتۇرلى نوميناتسيالار بويىنشا انىقتادى.

«ءبىز - باقىتتى وتباسىمىز» قالالىق بەينەروليكتەر بايقاۋىنىڭ باس جۇلدەسىنە ءامىرجانوۆتار وتباسى يە بولدى.

«ءبىز — كوپبالالى وتباسىمىز. سونىمەن قاتار اتا- انانىڭ قاراۋىنسىز قالعان بالالارعا دا كومەگىمىزدى بەرىپ تۇرامىز. ولاردى سپورتقا باۋلىپ، ەڭبەكقورلىققا ۇيرەتۋ ارقىلى كوپ جۇمىس ىستەيمىز. ءوزىمىزدىڭ تۋعان ءتورت بالامىز بولعانىنا قاراماستان، وزگە دە بالالاردى قاناتىمىزعا الىپ، ءوز بالالارىمىزداي كورىپ، مەيىرىمدىلىك تانىتامىز. ءار بالانىڭ وزىندىك ارمانى بولادى. سول ارمانداردىڭ ورىندالۋىنا سەبەپكەر بولىپ، سەنىمدىلىك قالىپتاسىرۋعا تىرىسامىز»، — دەدى ايدا ءامىرجانوۆا.

جەڭىمپازدار مەن جۇلدەگەرلەر «استانا دارىنى» دارىندىلىقتى دامىتۋ جانە پسيحولوگيالىق سۇيەمەلدەۋ ورتالىعىنىڭ باس جۇلدە، I ، II ، III ورىن ديپلومدارىمەن ماراپاتتالدى جانە «Go-Make « ق ق- نىڭ قولداۋىمەن اقشالاي سىياقى تابىستالدى.

ايتا كەتەيىك، بۇل بايقاۋعا «قازاقپارات» اگەنتتىگىنىڭ رەداكتورى ريزابەك نۇسىپبەك قاتىسىپ، ءۇشىنشى دارەجەلى ديپلوممەن ماراپاتتالدى.