07:40, 28 - مامىر 2021 | GMT +5
ليتۆاداعى ىرىكتەۋ ءتۋرنيرى: قازاقستاندىق جۇزگىش «التىن» الدى
نۇر- سۇلتان. قازاقپارات - جۇزۋدەن قازاقستان كومانداسىنىڭ مۇشەلەرى ليتۆادا وتكەن وليمپياداعا ىرىكتەۋ ءتۋرنيرىنىڭ فينالدىق سىنىن اياقتادى.
ەل قورجىنى التىن جۇلدەمەن تولىقتى، دەپ حابارلايدى قازاقپارات.
ۇلتتىق وليمپيادا كوميتەتىنەن ءمالىم ەتكەندەي، ادىلبەك مۋسين 50 مەترگە باتتەرفلياي ادىسىمەن جۇزۋدەن جەڭىمپاز اتاندى. ول اتالعان قاشىقتىقتى 23.75 سەكۋندا ءجۇزىپ وتكەن. ايتا كەتەلىك، اتالعان قاشىقتىق وليمپيادا باعدارلاماسىنا ەنبەيدى.
بۇدان بۇرىن اتالعان تۋرنيردە اناستاسيا رەزۆانتسيەۆا قولا مەدال يەلەنگەن بولاتىن. ەسكە سالايىق، توكيو وليمپياداسىنا ليتسەنزيا الۋ ءۇشىن ارنايى ءنورماتيۆتى ورىنداۋ قاجەت. ازىرگە، قازاقستان كومانداسىنىڭ قورجىنىندا دميتري بالاندين جەڭىپ العان ەكى جولداما بار.
