جاپونيانىڭ ەڭ قاۋىپسىز ماشيناسى انىقتالدى

ەكىنشى بۋىنداعى Subaru Levorg ۋنيۆەرسالىنا 1.8 ليترلىك بەنزيندى موتور ورناتىلعان (177 ا. ك.، 300 ن م). ول lineartronic ۆارياتورىمەن جۇمىس ىستەيدى. ماشينا تولىق جەتەكتى. اۆتوكولىك وتكەن كۇزدە جاپونيادا ساتىلىمعا شىققان. باعاسى 3,1 ميلليون يەننەن (12,2 ميلليون تەڭگە) باستالعان. بۇل مودەل قازاقستاندا ءالى ساتىلىمعا شىقپاعان.

بۇعان دەيىن ليەۆورگ «جىل كولىگى 2020/2021» اتانعان بولاتىن. ەندى ماشينانىڭ قاۋىپسىزدىك دەڭگەيى بەس جۇلدىزبەن باعالانىپ وتىر، كولىك ماكسيمۋم 190 ۇپايدىڭ 186.1 ءىن الدى. بۇل 2020-جىلى سىناقتان وتكەن جەڭىل اۆتوموبيلدەر اراسىنداعى ەڭ ۇزدىك كورسەتكىش.

JNCAP سىناعى ەكى بەتپە-بەت سوققى جاساۋ ارقىلى وتەدى. كولىكتىڭ ءپىشىنى وزگەرەتىن كەدەرگىگە 64 ك م/ساعات جىلدامدىقپەن جانە ءپىشىنى وزگەرمەيتىن كەدەرگىگە 55 ك م/ساعات جىلدامدىقپەن سوعىلعانداعى كۇيى انىقتالادى.

ودان بولەك بۇيىرلىك كراش-تەست، ورىندىقتاردى ستەندتىك سىناۋ (ارت جاقتان سوعۋ)، كاپوت ەرنەۋىندەگى قاۋىپسىزدىك جاستىعىنىڭ ىسكە قوسىلۋىن قوسا العاندا، جاياۋ جۇرگىنشىنى قاققان كەزدەگى شاناقتىڭ الدىڭعى بولىگىنىڭ جاراقاتتاماۋ مۇمكىندىگى، قاۋىپتىڭ الدىن الۋ جانە شۇعىل قىزمەتتى شاقىرۋ جۇيەلەرى تەكسەرىلەدى.

Levorg بۇل سىناقتاردىڭ بارىنەن ءمىنسىز ءوتتى.

massaget.kz