ورالدا جۇكتى كەلىنشەك وتىرعان جەدەل جاردەم كولىگى اپاتقا ۇشىرادى

ورال. قازاقپارات - ورالدا جۇكتى كەلىنشەكتى اۋرۋحاناعا اپارا جاتقان جەدەل جاردەم كولىگى جول اپاتىنا ۇشىرادى، دەپ حابارلايدى قازاقپارات ءتىلشىسى.

ب ق و پوليتسيا دەپارتامەنتى باسپا ءسوز قىزمەتىنەن تۇسكەن مالىمەتكە قاراعاندا، وقيعا بۇگىن شامامەن ساعات 13.47-دە بولدى. س. تيۋلەنين مەن م. شولوحوۆ كوشەلەرىنىڭ قيىلىسىندا جەدەل جاردەم كولىگى مەن Toyota Aiphard تۇيىسكەن. وقيعا ورنىندا پوليتسيا قىزمەتكەرلەرى جۇمىس جاسادى. وبلىستىق دەنساۋلىق ساقتاۋ باسقارماسىنىڭ ناقتىلاۋىنشا، بايتەرەك اۋدانى داريان اۋرۋحاناسىنىڭ سانيتارلىق كولىگى ەكىقابات ايەلدى كارديولوگتان كەڭەس الۋ ءۇشىن وبلىستىق كارديولوگيالىق ورتالىققا اپارا جاتقان. كولىكتە اۋرۋحانا مەدبيكەسى دە بولعان.

ارنايى كولىك جارىق بەرۋ بەلگىلەرىمەن كەلە جاتسا دا، كولىكتەردىڭ ءبىرى ونى وتكىبەي، سول جاعىنان تۇيگەن. سالدارىنان جەدەل جاردەم كولىگى ءبىر بۇيىرىنە اۋدارىلىپ قالدى. وقيعا ورنىنا جەتكەن باسقا جەدەل جاردەم كولىگى جۇكتى كەلىنشەكتى وبلىستىق پەريناتالدىق ورتالىققا جەتكىزدى. تەكسەرۋ كەزىندە ونىڭ جانە 35-36 اپتا بولعان شارانانىڭ زارداپ شەكپەگەنى انىقتالدى. دەگەنمەن ودان ءارى باقىلاۋ ءۇشىن ايەل ورتالىققا جاتقىزىلدى.

جۇرگىزۋشى زارداپ شەكپەگەن. مەدبيكەنىڭ ازداپ دەنەسى كوگەرگەن. پوليتسيا دەپارتامەنتىنىڭ حابارلاۋىنشا، سول مەرزىمدە اباي داڭعىلىندا تاعى ءبىر جول- كولىك وقيعاسى بولعان. Volkswagen Golf اۆتوكولىگىنىڭ جۇرگىزۋشىسى جول قاۋىپسىزدىگىن قامتاماسىز ەتپەستەن، بەلگىلەنبەگەن جەردەن ءوتىپ بارا جاتقان 1952 -جىلعى ەر ادامدى قاعىپ كەتكەن. دەنساۋلىق ساقتاۋ باسقارماسى جابىق باس- مي جاراقاتىن الىپ، ميى شايقالعان ەر ادامنىڭ قالالىق كوپبەيىندى اۋرۋحاناعا جەتكىزىلگەنىن ايتتى.

اۆتور: ەلجان ەرالى