اماندىق باتالوۆ قاشان زەينەتكە شىعادى - اكىمنىڭ جاۋابى

نۇر- سۇلتان. قازاقپارات - الماتى وبلىسىنىڭ اكىمى اماندىق باتالوۆ ورتالىق كوممۋنيكاتسيالار قىزمەتىندەگى بريفينگتە «زەينەتكە شىعۋعا دايىنسىز با؟» دەگەن سۇراققا جاۋاپ بەردى ، دەپ حابارلايدى قازاقپارات.

«ماعان دا وسى سۇراق ءجيى قويىلادى. مەملەكەت باسشىسى وسى لاۋازىمدى ماعان سەنىپ تاپسىرعاسىن، وعان مەنىڭ كۇشىم دە، دەنساۋلىعىم دا جەتەدى. مەن ۇنەمى جاستارعا، قاراماعىمداعى بالالارىما ايتامىن: ەرتەڭ ساعات 12-دە جۇمىستان كەتەسىڭ دەسە، مەن سول 12-گە دەيىن بۇل جۇكتەمەنى ادال ءارى جاۋاپتى تۇردە الىپ جۇرەمىن، حالىق ءۇشىن جۇمىس ىستەيمىن جانە مەملەكەت باسشىسىنىڭ تاپسىرمالارىن ورىندايمىن. بولدى. ال قاشان كەتەتىنىم: ەرتەڭ بە، ارعى كۇنى مە، ءبىر جىلدان كەيىن بە، كەرەك ادام ءوزى ويلانىپ، بولجامدارىن جاساي بەرسىن»، - دەپ جاۋاپ بەردى اماندىق باتالوۆ.

وبلىس اكىمى ءاربىر بەرىلگەن مۇمكىندىك ارقىلى ادامدار ءۇشىن، وبلىس ءۇشىن قىزمەت ەتىپ، ءوز تاجىريبەسىن جاستارعا بەرۋگە تىرىساتىنىن اتاپ ءوتتى.

«جۇمىس وتە كوپ. بۇل جۇمىستان تەك جاقسى ىستەر جاساعاندا عانا ءلاززات الاسىڭ»، - دەيدى اماندىق باتالوۆ.

ەسكە سالا كەتەيىك، بۇگىن ق ر پرەزيدەنتى جانىنداعى ورتالىق كوممۋنيكاتسيالار قىزمەتىندە «مەملەكەت باسشىسىنىڭ تاپسىرماسى اياسىندا الماتى وبلىسىنىڭ الەۋمەتتىك- ەكونوميكالىق دامۋى تۋرالى» ونلاين باسپا ءسوز كونفەرەنسياسى ءوتىپ جاتىر.

اۆتور: ايجان سەرىكجان قىزى