ناريمان تابىنبايەۆ ۆاكسينادان كەيىن اياق- قولى تارتىلىپ قالعان ايەل تۋرالى ايتتى

الماتى. قازاقپارات - الەۋمەتتىك جەلىدە ۆاكسينا العاننان كەيىن اياق- قولى تارتىلىپ، تىرىسىپ قالعان ايەلدىڭ ۆيدەوسى تارادى.

الماتى قالاسى قوعامدىق دەنساۋلىق باسقارماسىنىڭ باسشىسى ناريمان تابىنبايەۆ وقيعاعا قاتىستى پىكىر ءبىلدىردى، دەپ حابارلايدى قازاقپارات ءتىلشىسى.

«مۇنداي وقيعا راسىمەن بولعان. ۆيدەوداعى ايەل پەريناتولوگيا جانە بالالار كارديوحيرۋرگيا ورتالىعىندا اكۋشەر بولىپ قىزمەت ەتەدى. وسىدان 5 اي بۇرىن جۇمىسقا تۇرعان. 29 - ءساۋىر كۇنى ۆاكسينا سالدىرعان، قۇرىسۋ سيمپتوماتيكاسى بولعان. ول ەمحاناعا جانە كەشە №7 اۋرۋحاناعا بارعان جانە وقيعا راستالىپ وتىر. وعان ءتيىستى كومەك كورسەتىلىپ، ۇيگە جىبەرىلدى»، - دەدى ناريمان تابىنبايەۆ. سونىمەن قاتار، ول مەديتسينا قىزمەتكەرىن جۇمىستان شىعارامىز دەگەن اقپاراتقا قاتىستى تۇسىنىك بەردى.

«اتالعان اۋرۋحانا باسشىسىمەن سويلەستىك، بۇل جاعدايدا ماجبۇرلەۋ بولعان جوق، ءبىراق كوندىرۋ بولدى. مەن مۇنى دۇرىس دەپ سانايمىن، ويتكەنى ول اكۋشەر. ياعني بوساناتىن ايەلدەرگە كومەك كورسەتەتىن مامان. ول انا مەن بالاعا قاۋىپ توندىرمەۋى كەرەك. بۇل مەنىڭ ويىم، ونى ەشكىم جۇمىستان شىعارا المايدى، ءبىراق ۆاكسينا الۋعا كوندىرۋ قاجەت دەپ سانايمىن. نەگە ونىڭ كەسىرىنەن باسقا بىرەۋ زارداپ شەگۋى كەرەك»، - دەدى الماتىنىڭ باس دارىگەرى.

اۆتور: الما مۇقانوۆا