بەلگىلى اقىن، حورەوگراف دۇيسەنبەك ناقىپوۆ ومىردەن ءوتتى

الماتى. قازاقپارات - بەلگىلى اقىن، حورەوگراف، دراماتۋرگ دۇيسەنبەك ناقىپوۆ قايتىس بولدى، دەپ حابارلايدى قازاقپارات ءتىلشىسى.

«مەنىڭ اعام، اقىن، حورەوگراف- ليبرەتيست، سسەناريست، ۇلكەن جۇرەكتى ادام دۇيسەنبەك ناقىپوۆ بۇگىن، 26.05.2021 -جىلى ومىردەن ءوتتى»، - دەپ جازدى اقىننىڭ جيەنى Facebook-تەگى پاراقشاسىندا.

دۇيسەنبەك ناقىپوۆ 1946 -جىلى پاۆلودار وبلىسىندا دۇنيەگە كەلگەن. 1964 -جىلى ماسكەۋ اكادەميالىق حورەوگرافيالىق ۋچيليشەسىن بىتىرگەن. اتاقتى ءبيشى جانە پەداگوگ الەكساندر رۋدەنكونىڭ سىنىبىندا وقىعان. 1985 -جىلى الماتىداعى كيروۆ اتىنداعى قازمۋ- ءدى بىتىرگەن (قازىرگى ءال- فارابي اتىنداعى قازۇۋ).

الماتى وپەرا جانە بالەت (1964-1967 ج ج.)، فرۋنزە (1967-1968 ج ج.)، پەرم (1968-1969 ج ج.)، سامارقاند (1970-1972 ج ج.) جانە قايتا الماتى (1972-1985 ج ج.) تەاترلارىندا بالەت سوليسى بولدى.

«قازاقفيلم» كينوستۋدياسىندا باس رەداكتور بولىپ ىستەگەن. گالينا ۋلانوۆا، مايا پليسەتسكايا، ناتاليا بەسسمەرتنوۆا جانە باسقا دا تانىمال بالەت شەبەرلەرىمەن جەكە تانىس ەدى. 2010 -جىلى قازاقستاندا العاشقى بالالار «ەر توستىك» بالالار ەرتەگىسى جەلىسىمەن اتتاس بالەتىن قۇردى. 1995 -جىلى الماتىدا ونىڭ العاشقى ولەڭ كىتابى «ۆەچەر ۆەكا» جارىق كوردى. كەيىن «پەسنيا مولليۋسكا» (2000 ج. )، «بليزنەتسى» (2001 -جىلى، كىتاپ اۆتوردىڭ نيۋ- يوركتە 2001 -جىلى 11 -قىركۇيەكتە بولعان لاڭكەستىگىنەن 20 كۇنگى اسەرىمەن جازىلعان.)، «كرۋگ پەپلا» رومانى (2006 -جىلى، 2009 -جىلى)، «ۆرەميا رە» ولەڭدەر جيناقتارى شىققان.

اقىن، جازۋشى، دراماتۋرگ، ليبرەتيست، كوپتەگەن ادەبي سىياقىلاردىڭ يەگەرى، قازاقستان حورەوگرافتارى كەڭەسىنىڭ ءتوراعاسى، كينوسسەناريست، بالەت تەاترىنىڭ رەجيسسەرى، بىرنەشە مادەني جانە گۋمانيتارلىق باعدارلامالاردىڭ ۇيىمداستىرۋشىسى، «پريز ۋلانوۆوي» حالىقارالىق بالەت فەستيۆالىنىڭ پرەزيدەنتى بولدى. 5 - ماۋسىمدا اقىن 75 جاسقا تولار ەدى.

اۆتور: الما مۇقانوۆا