اقمولا وبلىسىندا جاڭا ءسۇت فەرماسى ىسكە قوسىلادى

كوكشەتاۋ. قازاقپارات - اقمولا وبلىسى ەلىمىزدىڭ ءىرى اگروونەركاسىپتىك وڭىرلەرىنىڭ ءبىرى بولىپ تابىلادى. استىق وندىرۋمەن قاتار مال شارۋاشىلىعى سالاسىن دا، سونىڭ ىشىندە باعىتتاردىڭ ءبىرى - ءسۇتتى مال شارۋاشىلىعىن دا دامىتۋعا كوپ كوڭىل بولىنەدى.

بۇگىنگى تاڭدا اقكول اۋدانىندا قۋاتتىلىعى 300 باس بولاتىن جاڭا ءسۇت فەرماسىنىڭ قۇرىلىسى قارقىندى ءجۇرىپ جاتىر، دەپ حابارلايدى قازاقپارات ءتىلشىسى وبلىستىڭ ىشكى ساياسات باسقارماسىنا سىلتەمە جاساپ.

«اقكول اگرو» سەرىكتەستىگى ىشكى نارىقتى ساپالى ءارى تابيعي ونىممەن قامتاماسىز ەتۋدى جوسپارلاپ وتىر. قازىردىڭ وزىندە 40 باس اسىل تۇقىمدى ءىرى قارا مال ساتىپ الىندى.

«ءسۇت فەرماسىنىڭ قۇرىلىسى وتكەن جىلى باستالدى. ءبىر ميلليارد تەڭگەدەن استام سوماعا سيىر ساتىپ الۋدى جوسپارلاپ وتىرمىز. 2022 -جىلدىڭ قاڭتار- اقپان ايلارىندا ولاردان ءسۇت الىناتىن بولادى. اقمولا جانە پاۆلودار وبلىستارىندا ءسۇت ونىمدەرىنە سۇرانىستىڭ جوعارى ەكەندىگى بايقالادى»، - دەپ اتاپ ءوتتى «اقكول اگرو» ج ش س ديرەكتورى ءمادي ەسقارايەۆ.

«اقكول اگرو» جاقىن ارادا اۋداننىڭ ءىرى ءسۇت فەرمالارىنىڭ بىرىنە اينالۋدى جوسپارلاپ وتىر. الدىن الا جوسپار بويىنشا شارۋاشىلىقتىڭ قۋاتتى 500 توننادان استام ءسۇت شىعارۋعا جەتەدى. كاسىپورىن باسشىلىعىنىڭ ايتۋىنشا، بۇل اۋىل شارۋاشىلىعى سالاسىندا ءسۇت ءوندىرىسىن دامىتۋعا ايتارلىقتاي سەپتىگىن تيگەتىن بولادى.

ءسۇت فەرماسىنىڭ قۇرىلىسى جىل سوڭىندا اياقتالادى. جاقىن ارادا ەۋروپادان سيممەنتال تۇقىمدى ءسۇتتى سيىرلاردى اكەلۋ جوسپارلانۋدا. اعىمداعى جىلدىڭ باسىنان بەرى وڭدەلگەن ءسۇت كولەمى 31,9 مىڭ توننانى قۇرادى، 241 توننا سارى ماي، 281 توننا ىرىمشىك پەن سۇزبە، 1,6 مىڭ توننا اشىعان ءسۇت ونىمدەرى ءوندىرىلدى.