قازاقستاندا ءاربىر التىنشى كاسىپورىن الماتىدان اشىلعان
باقىتجان ساعىنتايەۆتىڭ ايتۋىنشا، الماتىنى دامىتۋدىڭ نەگىزگى قورعاۋشى كۇشى - بيزنەس جانە ادامدار. مەگاپوليس ەلىمىزدىڭ ەڭ كرەاتيۆتى، باستاماشىل جانە ءبىلىمدى ادامدارىن وزىنە تارتۋدا. بۇگىندە قالا ەكونوميكاسىنىڭ %45 دان استامىن جەكە بيزنەس قالىپتاستىرىپ وتىر. قازاقستاننىڭ ءاربىر التىنشى كاسىپورنى الماتىدا اشىلعان. الماتىدا جۇمىس ىستەيتىن حالىقتىڭ 70 پايىزعا جۋىعى جوعارى ءبىلىمدى. قالادا ەلىمىزدەگى ەڭ ۇزدىك شىعارماشىلىق كادرلار شوعىرلانعان، ولاردى جىل سايىن 39 جوعارى وقۋ ورىندارى دايىندايدى.
قالالىق جانە ايماقتىق باعدارلامالار اياسىندا ناقتىلى سۇرانىسقا يە ماماندار بويىنشا جۇمىسسىزدار كاسىپتىك ءبىلىم الىپ، قايتا دايارلانىپ جانە بىلىكتىلىگىن ارتتىرىپ جاتىر. بىلتىر «ەڭبەك» باعدارلاماسى بويىنشا مىڭنان استام ادام قىسقا مەرزىمدى كاسىپتىك وقۋدان ءوتتى. 2020 -جىلى كاسىپكەرلەردى وقىتۋعا ارنالعان Edu.almatybusiness پورتالى ىسكە قوسىلدى، وندا ءبىلىم بويىنشا 200 دەن استام ۆيدەوروليك جاريالانعان. پورتالدا 110 مىڭنان استام قولدانۋشى تىركەلگەن. بۇل تاجىريبە بيىل دا جالعاسادى.
«ۇساق ىستەردەن باستاپ، ءبىز اۋقىمدى ماقساتتاردى جۇزەگە اسىرۋ بويىنشا جوسپارلى جانە جۇيەلى جۇمىس ىستەيمىز. بۇگىندە الماتىدا اگلومەراتسيانى قوسقاندا ءۇش ميلليوننان استام ادام تۇرادى. دەمەك، تاياۋ جىلدارى ەكونوميكانىڭ ەداۋىر ءوسۋىن قامتاماسىز ەتىپ، قوسىمشا قۇنى جوعارى جانە ەكسپورتتىق الەۋەتى بار جاڭا سەكتورلاردى جانە مىڭداعان جۇمىس ورىندارىن اشىپ، ەڭبەك ونىمدىلىگىن ارتتىرۋىمىز قاجەت»، - دەدى قالا اكىمى باقىتجان ساعىنتايەۆ.
ونىڭ ايتۋىنشا، ادامي كاپيتالدى دامىتۋعا باعىتتالعان ەكونوميكالىق ساياساتتا قولدانىلاتىن ءتيىمدى ادىستەر بيزنەس جۇرگىزۋگە قولايلى قالا قۇرۋعا مۇمكىندىك بەردى. مەگاپوليس ودان ءارى دامۋىندا تۇراقتى دامۋ باعىتىندا ەىدۇ ستاندارتتارىنا جانە الەمدىك وزىق تاجىريبەگە جۇگىنەتىن بولادى. جەرگىلىكتى رەفورمالاردى جۇزەگە اسىرۋداعى جاھاندىق پايىمى الماتىنىڭ 2050 -جىلعا دەيىنگى دامۋ ستراتەگياسىندا كورىنىس تاپقان.
