شەتەل ازاماتتارى قازاقستان اۋماعىندا ءجۇرىپ-تۇرۋ قۇقىعىن قايتا زاڭداستىرۋى ءتيىس
بۇل تۋرالى ق ر ۇ ق ك شەكارا قىزمەتىنىڭ شەكارالىق باقىلاۋ دەپارتامەنتى باسشىسىنىڭ ورىنباسارى مۇڭداش موللاشيەۆ ءمالىم ەتتى، دەپ حابارلايدى قازاقپارات ءتىلشىسى.
«2021-جىلعى 5- ماۋسىمدا شەتەل ازاماتتارىنىڭ قازاقستان رەسپۋبليكاسىنىڭ اۋماعىندا ۋاقىتشا بولۋ مەرزىمى اياقتالادى. اتالعان مەرزىم ۆەدومستۆوارالىق كوميسسيانىڭ (ۆ ا ك) 2020-جىلعى 29- جەلتوقسانداعى شەشىمىمەن پاندەمياعا بايلانىستى ۇزارتىلعان بولاتىن. قازىرگى ۋاقىتتا قازاقستان رەسپۋبليكاسىنىڭ مەملەكەتتىك شەكاراسى ارقىلى قۇرلىقتاعى جانە اۆياتسيالىق وتكىزۋ بەكەتتەرى شتاتتىق رەجيمدە جۇمىس ىستەيدى.
سونداي-اق، بۇگىندە 15 مەملەكەتپەن (رەسەي فەدەراتسياسى، بەلارۋس رەسپۋبليكاسى، قىرعىزستان رەسپۋبليكاسى، وزبەكستان رەسپۋبليكاسى، تاجىكستان رەسپۋبليكاسى، كورەيا رەسپۋبليكاسى، ۋكراينا، تۇركيا، ەگيپەت، گەرمانيا، بىرىككەن اراب امىرلىكتەرى، نيدەرلاندى كورولدىگى، گرۋزيا، چەرنوگوريا، شري-لانكا) تۇراقتى اۋە قاتىناسى قايتا جاڭارتىلدى»، - دەدى مۇڭداش موللاشيەۆ اتالعان ۆەدومستۆودا ونلاين وتكەن باسپا ءسوز ءماسليحاتىندا.
ونىڭ ايتۋىنشا، قازاقستان اۋماعىنا 101 شەكارالىق بەكەت ارقىلى كىرۋگە بولادى. ونىڭ ىشىندە اۆتوموبيل جولاۋشىلارىنا ارنالعان 51 بەكەت، 19 اۋە جانە 3 تەڭىز بەكەتى قىزمەت ەتەدى. سونداي-اق، ول كارانتين شەكتەۋلەرىنە بايلانىستى بۇگىندە 12 بەكەتتىڭ قىزمەتى ۋاقىتشا توقتاتىلعانىن تىلگە تيەك ەتتى.
«ۇلتتىق قاۋىپسىزدىك كوميتەتىنىڭ شەكارا قىزمەتى شەتەلدىكتەردى ازاماتتىعى بار ەلگە كەدەرگىسىز قايتارۋ بويىنشا شارالار قابىلداۋدا. اتاپ ايتقاندا، كارانتيندىك شەكتەۋلەر كەزىندە، ونىڭ ىشىندە ونلاين فورماتتا ادامداردىڭ ەلدەن شىعۋ ءتارتىبىن ءتۇسىندىرۋ ۇيىمداستىرىلدى. وسى ورايدا اكىمشىلىك جاۋاپقا تارتىلماس ءۇشىن شەتەلدىكتەر مەن ولاردى شاقىراتىن ادامدارعا قازاقستان اۋماعىندا ودان ءارى ءجۇرىپ-تۇرۋدى 5- ماۋسىمعا دەيىن زاڭداستىرۋ قاجەتتىگىن ەسكەرتكىمىز كەلەدى»، - دەيدى ول.
