قازاقستاندىقتار شەتەلگە رۇقساتسىز شىعا الا ما - ۇ ق ك جاۋاپ بەردى

«قازاقستان رەسپۋبليكاسىنىڭ شەكاراسىنان ءوتۋ تۋرالى ەرەجەگە سايكەس، ءبىزدىڭ ەلدىڭ ازاماتتارى 1 ايدا (30 كۇننىڭ ىشىندە) 1 رەت ءوزىنىڭ ەلدەن شىعۋ سەبەبىن ءتۇسىندىرىپ، دالەلدەمەي-اق باسقا ەلگە بارا الادى.

ەگەر ازامات اتالعان ۋاقىت ىشىندە ەلدەن 1 رەت شىعىپ كەلىپ، قايتا شەتەلگە اتتانعىسى كەلسە، وندا سىرت مەملەكەتكە بارۋ سەبەبىن ءتۇسىندىرۋى ءتيىس.

دەگەنمەن كەي ازاماتتارعا 30 كۇندى كۇتپەي-اق شەتەلگە بارۋعا رۇقسات بەرىلەدى.

اتاپ ايتقاندا، ازامات شەتەلدە وقىعان جاعدايدا، فورس-ماجور بولعاندا ياعني وتباسى مۇشەلەرى نەمەسە جاقىندارى اۋىرىپ قالسا نەمەسە قازا تاپقاندا، ەم الۋ ماقساتىندا (ەم الۋعا بارا جاتقانىن دالەلدەيتىن ءتيىستى قۇجاتتارى بولۋى ءتيىس)، سول سياقتى شەت مەملەكەتتە تۇراقتى مەكەنجايى بولعان جاعدايدا رۇقسات بەرىلەدى»، - دەدى ق ر ۇ ق ك شەكارا قىزمەتى شەكارالىق باقىلاۋ دەپارتامەنتى باسشىسىنىڭ ورىنباسارى مۇڭداش موللاشيەۆ.

ونىڭ ايتۋىنشا، قازاقستاندىقتار شەتەلگە شىعۋ ءۇشىن شەكارالىق قىزمەتتىڭ 3 ءتۇرىن قولدانا الادى.

ول - اۋە، اۆتوكولىك جانە تەڭىز قاتىناسى.

بۇعان دەيىن ۇ ق ك شەكارا قىزمەتىنىڭ وكىلى ەل ازاماتتارى ءۇشىن 15 مەملەكەتپەن اۋە قاتىناسىنىڭ قايتا جولعا قويىلعانىن مالىمدەگەن بولاتىن.