قورعانىس ءمينيسترى اسكەري ۇشقىش ايەلدى قابىلدادى

نۇر-سۇلتان. قازاقپارات - قازاقستاننىڭ قورعانىس ءمينيسترى نۇرلان ەرمەكبايەۆ مايدان اۆياتسياسىنىڭ ۇشقىشى اعا لەيتەنانت اردانا بوتايدى قابىلدادى، دەپ حابارلايدى قازاقپارات ۆەدومستۆونىڭ باسپا ءسوز قىزمەتىنە سىلتەمە جاساپ.

قورعانىس ۆەدومستۆوسىنىڭ باسشىسى قازاقستاندا اسكەري- ۇشقىش ماماندىعىنا ايەلدەر دايارلاۋ مۇمكىندىكتەرى مەن كەلەشەگى تۋرالى باياندامانى تىڭدادى.

«نازىك جاندىلار ءارقاشان ەرلەردىڭ ءىسى سانالاتىن اسكەري ماماندىقتى، ونىڭ ىشىندە اسكەري اۆياتسيانى دا قارقىندى مەڭگەرۋدە»، - دەدى اردانا بوتاي.

اعا لەيتەنانت اردانا بوتاي قاراعاندى اۆياتسيا بازاسىندا اعا جويعىش-ۇشقىشى قىزمەتىن اتقارادى. اۋەدە شامامەن 500 ساعاتقا جۋىق ۇشۋ تاجىريبەسى بار.

بالا كۇنىنەن اسكەري ۇشقىش بولۋدى ارمانداعان. الماتى قالاسىنداعى ازاماتتىق اۆياتسيا اكادەمياسىنىڭ «اۋە كەمەلەرى مەن قوزعالتقىشتاردى ۇشۋعا پايدالانۋ» ماماندىعى بويىنشا وقۋدى بىتىرگەننەن بەرى ول قارۋلى كۇشتەردىڭ ساپىندا.

العاش رەت 2018 -جىلى ءساۋىر ايىندا ل-39 جاۋىنگەرلىك ۇشاعىمەن اۋەنى شارلاعان. TL-2000, Tecnam P-2002 اسا جەڭىل ۇشاقتارىن، Diamond DA42 ەكى موتورلى ۇشاعىن مەڭگەرگەن. قازىرگى ۋاقىتتا اسكەري قىزمەتشى سۋ-30س م جاڭا بۋىندى جويعىش ۇشاعىن باسقارادى. ول اسكەري ۇشقىش جولداسى سياقتى كومانديرلىك مانساپتى ارماندايدى.

قورعانىس ءمينيسترى ايەل اسكەري قىزمەتشىلەردىڭ ءتۇرلى ماماندىقتار بويىنشا دايارلىعى مەن ولاردىڭ قارۋلى كۇشتەردىڭ دامۋىنا قوسقان ۇلەسىنىڭ ماڭىزىن اتاپ ءوتتى.