دەپۋتات بالا كۇتىمى بويىنشا جاردەماقى مولشەرىن ارتتىرۋدى سۇرادى

نۇر- سۇلتان. قازاقپارات - پارلامەنت ءماجىلىسىنىڭ جالپى وتىرىسىندا دەپۋتات ايجان سقاقوۆا بالا كۇتىمى بويىنشا جاردەماقى مولشەرىن ارتتىرۋدى سۇرادى، دەپ حابارلايدى قازاقپارات ءتىلشىسى.

«انا مەن بالا، ولاردىڭ دەنساۋلىعى مەن ءال- اۋقاتى ءبىر- بىرىمەن تىعىز بايلانىستى. سونىمەن، ءبىرىنشى فاكتور - بالا كۇتىمى بويىنشا جاردەماقى مۇلدەم جەتكىلىكسىز! جۇمىس ىستەمەيتىن ايەلدەر ءۇشىن بالا كۇتىمى بويىنشا اي سايىنعى جاردەماقى: ءبىرىنشى بالاعا 16802 تەڭگەنى، ەكىنشى بالاعا - 86519 تەڭگەنى، ءۇشىنشى بالاعا - 22898 تەڭگەنى، ءتورتىنشى جانە ودان ارتىق بالاعا - 25961 تەڭگەنى قۇرايدى. بۇل ءبىر بالاعا كۇنىنە 560 تەڭگەدەن 865 تەڭگەگە دەيىن جۇمسالادى دەگەن ءسوز. ال قاماۋداعى ءبىر ادامنىڭ تاماعىنا 1018 تەڭگە قاراستىرىلعان. بالانىڭ اناسىنا جاردەماقىدا اقشا قاراستىرىلماعان!»، - دەدى دەپۋتات ۇكىمەت باسشىسىنىڭ ورىنباسارى ەرالى توعجانوۆتىڭ اتىنا جولداعان ساۋالىندا.

ونىڭ پايىمىنشا، جاردەماقىلارعا قاتىستى راسىمدەردىڭ كوپتىگى، ولاردى اكىمشىلەندىرۋدىڭ كۇردەلىلىگى سىبايلاس جەمقورلىق سحەمالارىن تۋدىرادى. سونداي- اق ازاماتتاردى زاڭسىز ارەكەتتەرگە يتەرمەلەيدى. مىسالى، ا ءا ك جاعدايىندا ادامدار وتباسىنىڭ تابىسىن ازايتۋ ماقساتىندا اتا- انالاردىڭ جالعان اجىراسۋى سياقتى جانە ت. ب. جاردەماقى الۋدىڭ سحەمالارىنا جۇگىنەدى. بۇدان بولەك ا. سقاقوۆا وسال توپتاعى قازاقستاندىقتار ءۇشىن تۇرعىن ءۇيدىڭ قولجەتىمسىزدىگى ماسەلەسىنە توقتالدى. «قولدا بار مەملەكەتتىك باعدارلامالاردىڭ جەتكىلىكسىز ەكەنىن ءتۇسىنۋ كەرەك. ويتكەنى ولار بارلىق قازاقستاندىقتارعا جارامايدى. ولار ەڭ بولماعاندا ورتاشا تابىسى بار ادامدارعا ارنالعان»، - دەدى دەپۋتات.

اۆتور: رۋسلان عابباسوۆ