دەپۋتات «الىپپە» مەن «انا ءتىلى» وقۋلىعىنا قاتىستى ۇسىنىستار ايتتى

نۇر- سۇلتان. قازاقپارات - بۇگىن پارلامەنت ءماجىلىسىنىڭ جالپى وتىرىسىندا دەپۋتات جاناربەك ءاشىمجانوۆ ءبىلىم جانە عىلىم ءمينيسترى اسحات ايماعامبەتوۆتىڭ اتىنا «الىپپە» جانە «انا ءتىلى» وقۋلىعىنا قاتىستى دەپۋتاتتىق ساۋالىن جولدادى.

دەپۋتات اتاپ وتكەندەي، باستاۋىشتا ساۋات اشۋدىڭ «الىپپە» كەزەڭىن دۇرىس قالىپتاستىرىپ، عىلىمي نەگىزدە جەتىلدىرۋ اسا ماڭىزدى.

«ءبىز ءبىلىمنىڭ ىرگەتاسى سانالاتىن سول «الىپپەدەن» ەش نەگىزسىز باس تارتتىق. اراداعى «الىپپەسىز» وتكەن جىلدار سول قادامنىڭ ۇلكەن قاتەلىك بولعانىن انىق كورسەتتى. وقۋ سالاسى ونسىز دا وڭباي تۇرعان ەدى، 2019 -جىلدىڭ سوڭىندا ەكونوميكالىق ىنتىماقتاستىق جانە دامۋ ۇيىمى (ە ى د ۇ) مەن ءبىلىم جەتىستىكتەرىن باعالاۋ جونىندەگى حالىقارالىق قاۋىمداستىق (EA) ءبىلىم بەرۋ سالاسىنداعى ءۇش حالىقارالىق سالىستىرمالى زەرتتەۋدىڭ ناتيجەلەرىن جاريالادى. قازاقستان بۇل ۇيىمداردىڭ زەرتتەۋى بويىنشا ۇشەۋىندە دە اۋسايدەر بولدى. وسى ورايدا، ۇلتتىق تاربيەگە باسا نازار اۋدارۋدى مىندەتتەگەن مەملەكەت باسشىسى قاسىم- جومارت توقايەۆ ساپالى جانە كاسىبي وقۋلىق ازىرلەۋدى قاتاڭ تاپسىرعان. ءبىلىم جانە عىلىم ءمينيسترى جاڭا الىپپە ا. بايتۇرسىن ۇلىنىڭ ادىستەمەسى نەگىزىندە ازىرلەنەتىنىنە بۇكىل حالىقتى سەندىردى. جانە بۇكىل قوعام كۇتىپ وتىرعان جاڭا «الىپپە» ءبىلىم بەرۋ جۇيەسىنە بايتۇرسىن ۇلىنىڭ سالعان ىزىمەن قايتا ورالادى دەگەن سەنىمدە»، - دەپ توقتالدى دەپۋتات.

ونىڭ ايتۋىنشا، بيىل 400 مىڭعا جۋىق التى جاسار بالا مەكتەپ تابالدىرىعىن اتتاماق. «بۇگىندە سول قوعام باقىلاۋىنداعى وقۋلىقتاردىڭ جاي- كۇيى قالاي؟ «الىپپە» ازىرلەۋ جوباسىنا قانشا ەڭبەك ءتۇستى؟ «الىپپە» مەن «انا ءتىلىن» كىمدەر جانە قالاي جازىپ جاتىر؟ اشىقتىق پەن باسەكە قاي دەڭگەيدە؟ قانداي كريتەرييلەرمەن باعالاندى؟ وقۋلىققا تاپسىرىس بەرۋشى كىم؟ وزىق وقۋلىقتى انىقتايتىن مينيسترلىك جانىنان قۇرىلعان ارنايى ساراپتامالىق كوميسسيا قالاي جاساقتالادى؟ قانداي مامانداردان قۇرىلعان؟ بۇل كوميسسياعا باسپالاردىڭ «بارماق باستى، كوز قىستى» ىقپالى جوق پا؟ وقۋلىق پەن وقۋ- ادىستەمەلىك كەشەنىنىڭ جوباسىن ازىرلەپ، باسپاعا تاپسىرۋ جاۋاپكەرشىلىگى نەگە تىكەلەي مينيسترلىكتىڭ قۇزىرىندا ەمەس؟ بۇل ساۋالدار باسىنان نەبىر سىناقتى وتكىزگەن ءبىلىم سالاسىندا ءالى كۇنگە اشىق تۇر. جالپى، «الىپپەمەن» قاتار ەنگىزىلەتىن باسقا دا جاڭا وقۋلىقتاردىڭ دايىندىعى مەن ساپاسىنىڭ جاي- كۇيى تۋرالى اتا- انالار تاراپىنان سۇراق كوپ»، - دەدى جاناربەك ءاشىمجانوۆ.

«جالپى، «الىپپە» مەن «انا ءتىلى» وقۋلىقتارىنىڭ تاعدىرى الەۋمەتتىك جەلىدەگى قولدان ۇيىمداستىرىلعان داۋىستار مەن بەس- التى ءجۇز ادامنىڭ باسقان «لايك» ارقىلى لايىق دەپ تانىلماۋ كەرەك. جاس ۇرپاقتىڭ ساناسىنا ساۋلە قۇياتىن وقۋلىق ساپاسى - ءبىرىنشى كەزەكتەگى ۇلتتىق جاۋاپكەرشىلىك.

ەل نازارىن اۋدارعان «الىپپە» مەن «انا ءتىلى» وقۋلىعىنىڭ ماڭىزدىلىعىن ەسكەرە وتىرىپ، مىنا جايتتاردى ۇسىنامىز:

بىرىنشىدەن، وزىق دەپ تانىلعان وقۋلىقتى ارنايى قازاقستان رەسپۋبليكاسى ۇكىمەتىنىڭ دەڭگەيىندە كەڭەيتىلگەن القانىڭ (كاسىبي ماماندار، دەپۋتاتتار، قوعام قايراتكەرلەرى، اقپارات قۇرالدارىنىڭ وكىلدەرىنەن قۇرالعان) اشىق تالقىسىنان وتكىزۋ كەرەك.

ەكىنشىدەن، 1-سىنىپتى وقىتاتىن مۇعالىمدەردىڭ كاسىبي بىلىكتىلىگىن ارتتىرۋ باعىتىندا ارنايى ءىس- شارالاردى قولعا الۋ كەرەك.

ۇشىنشىدەن، «الىپپەدەن» «انا تىلىنە» وتەتىن كەزەڭدەگى بىرىزدىلىك ساباقتاستىعىن تەرەڭ يگەرۋ ءۇشىن مۇعالىمدەرگە جۇيەلى تۇردە تۇسىندىرمە جۇمىستارىن جۇرگىزۋ قاجەت.

تورتىنشىدەن، بازالىق وقۋلىقتاردى ازىرلەۋ، ساراپتامادان وتكىزۋ، باسىپ شىعارۋ ءىسى، ۇيىمداستىرۋ شارالارىن اشىق وتكىزۋ قۇزىرەتىنىڭ بارلىعى ۇكىمەتتە نەمەسە ءبىلىم جانە عىلىم مينيسترلىگىندە بولۋى كەرەك»، - دەدى دەپۋتات.

اۆتور: رۋسلان عابباسوۆ