الماتىنىڭ قاي وزەن-كولدەرىندە شومىلۋعا بولادى؟
الماتى قالاسى توتەنشە جاعدايلار دەپارتامەنتى باستىعىنىڭ ورىنباسارى ەرلان الىبەكوۆتىڭ ايتۋىنشا، قالا اۋماعىنان 28 شاعىن وزەن اعىپ وتەدى، سونىمەن قاتار قالا ىشىندە 26 سۋ قويماسى بار. مەگاپوليستە شومىلۋعا رۇقسات ەتىلگەن 4 ورىن بەلگىلەندى.
ولار:
1. د. قونايەۆ اتىنداعى ۇلكەن الماتى كانالى - باۋم توعايى؛
2. د. قونايەۆ اتىنداعى ۇلكەن الماتى كانالى - گۇلدەر دەمالىس ايماعى؛
3. سايران كولى - تولە ءبي كوشەسىنەن وڭتۇستىك باعىتتا 300 مەتر؛
4. سايران كولى - تولە ءبي كوشەسىنەن پيرسكە دەيىن وڭتۇستىك باعىتتا 300 مەتر.
ونلاين بريفينگ بارىسىندا ەرلان الىبەكوۆ «جابايى» جاعاجايلاردا شومىلۋ كەلەڭسىز جاعدايلارعا اكەلۋى مۇمكىن ەكەنىن ەسكەرتتى.
سونىمەن قاتار، ول اتا-انالاردان جازعى دەمالىس كەزىندە بالالاردىڭ قاۋىپسىزدىگىنە نازار اۋدارۋدى سۇرادى.
«بيىل ءبىر ادام سۋعا كەتتى. تاجىريبە مەن باقىلاۋ ناتيجەسى كورسەتكەندەي، قايعىلى وقيعالار ادامداردىڭ ءتيىستى ءتارتىپ ەرەجەلەرىن بۇزۋىنان ورىن الۋدا. وتكەن جىلى جۇرگىزىلگەن پروفيلاكتيكالىق ءىس-شارالاردىڭ ارقاسىندا سۋدا ادام ءولىمى تىركەلگەن جوق، الايدا سايران كولىندە قۇتقارۋشىلار 4 ادامدى قۇتقاردى»، - دەيدى ەرلان الىبەكوۆ.
بيىل توتەنشە جاعدايلار دەپارتامەنتىنىڭ قىزمەتكەرلەرى اۋدان اكىمدىكتەرىمەن بىرلەسىپ شومىلۋعا تىيىم سالىنعان جەرلەردە 58 بەلگى ورناتتى. ال سايران كولىندە «سۋداعى قاۋىپسىزدىك شارالارى مەن ەرەجەلەرى تۋرالى» بيلبورد ورنالاستىرىلدى.
دەپارتامەنت وكىلى بيىلعى جازدا الماتى سۋ ايدىندارىندا قۇتقارۋشىلار، سۋدا قۇتقارۋ وتريادىنىڭ جانە پوليتسيا قىزمەتكەرلەرىنىڭ، ق ر ۇلتتىق ۇلانىنىڭ 5571№ «وڭتۇستىك» ءبولىمىنىڭ اسكەري قىزمەتشىلەرى كۇن سايىن كەزەكشىلىك ەتەتىنىن ءمالىم ەتتى.
«دەمالىس كۇندەرى بۇل جۇمىس كۇشەيتىلگەن رەجيمدە وتەدى. ءتارتىپ بۇزۋشىلار اكىمشىلىك جاۋاپكەرشىلىككە تارتىلادى. مىسالى، وتكەن جىلى بەلگىلەنبەگەن ورىنداردا شومىلعانى ءۇشىن 6 ادامعا ايىپپۇل سالىندى. سوندىقتان رۇقسات ەتىلگەن جەرلەردە عانا شومىلىڭىز، جاعالاۋدان جانە قورشاۋ بەلگىلەرىنەن الىس جۇزبەڭىز. ەگەر ءسىز رۇقسات ەتىلگەن جەردە شومىلساڭىز، بەلدەن جوعارى سۋعا كىرمەڭىز. بالالاردى قاراۋسىز قالدىرماڭىز. قايىقتاردان، كوپىرلەردەن جانە ايلاقتاردان سۋعا سەكىرمەڭىز. تۇنگى ۋاقىتتا جانە ماس كۇيدە شومىلماڭىزدار»، - دەيدى الماتى ت ج د باسشىسىنىڭ ورىنباسارى.
ەسكە سالايىق، قۇتقارۋ قىزمەتىنىڭ ءبىرىڭعاي تەلەفونى - 112.
