سارىوزەك تۇرعىندارى ۇيدەن قۇبىر تارتىپ، تۇرمىستىق قالدىقتى ارىققا اعىزعان

تالدىقورعان. قازاقپارات - الماتى وبلىسىنداعى كەربۇلاق اۋدانىنىڭ ورتالىعى - سارىوزەكتە تۇرعىندار تۇرمىستىق قالدىقتاردى ارىققا اعىزعان، - دەپ حابارلايدى قازاقپارات ءتىلشىسى.

الەۋمەتتىك جەلىگە تارالعان ۆيدەودا ەسكى ۇيلەردىڭ بالكونىنان، قابىرعاسىنان ۇزىن قۇبىرلاردىڭ دالاداعى ارىققا قاراي باعىتتالىپ، جاسالعانىن كورۋگە بولادى.

«سارىوزەك. دارەتحانا»، - دەپ پىكىر بىلدەرەدى ۆيدەو اۆتورى. الماتى وبلىستىق سانيتاريالىق- ەپيدەميولوگيالىق باقىلاۋ دەپارتامەنتىنىڭ باسپا ءسوز قىزمەتى اتالعان جايتقا بايلانىستى تۇسىنىكتەمە بەردى. «ينستاگرام جەلىسىندە كەربۇلاق اۋدانى، سارىوزەك اۋىلىنداعى 2 قاباتتى ۇيدەن قۇبىرلار ارقىلى سىرتقا كارىز سۋىنىڭ اعىپ جاتقانى تۋرالى ۆيدەو تارادى.

شۇعىل تۇردە جەرگىلىكتى اكىمدىك، اۋداندىق پوليتسيا ءبولىمى، اۋداندىق سانيتاريالىق- ەپيدەميولوگيالىق باسقارما ماماندارىنان كوميسسيا قۇرىلىپ، اتالعان ءمان-جايدى تەكسەردى. تەكسەرۋ كەزىندە انىقتالعانداي، جوعارىدا اتالعان 2 قاباتتى ۇيلەر سارىوزەك اۋىلىنىڭ ءال-فارابي كوشەسىندە ورنالاسقان. جەكە مەنشىك يەلىگىندە. تۇرعىندار ەشكىمنىڭ كەلىسىمىنسىز تۇرمىستىق قالدىق سۋلاردى قۇبىر ارقىلى كوشەدەگى ارىققا باعىتتاپ، توككەن.

كوميسسيا جەرگىلىكتى تۇرعىندارعا ءتۇسىندىرۋ جۇمىستارىن جۇرگىزىپ، اتالعان ءىس-ارەكەتتىڭ زاڭسىز ءارى قورشاعان ورتاعا ەپيدەميولوگيالىق تۇرعىدان قاۋىپتى ەكەندىگى ءتۇسىندىرىلدى. ناتيجەسىندە تۇرمىستىق قالدىق سۋلاردى نەگىزسىز توككەنى ءۇشىن اتالعان 2 ءۇيدىڭ تۇرعىنىنا ق ر ءا ق ب تۋرالى كودەكسىنىڭ 505-بابى بويىنشا ەسكەرتۋ بەرىلىپ، ترۋبالار الىنىپ تاستالدى»، - دەلىنگەن ۆەدومستۆونىڭ حابارلاماسىندا.

اۆتور: سامال قابىشەۆا