ءۇندىستاندا ناۋقاستار قارا زەڭنىڭ كەسىرىنەن كوزدى ويىپ الدىرتىپ جاتىر

نۇر-سۇلتان. قازاقپارات -ءۇندىستاندا قارا زەڭ اۋرۋى قالىڭ بۇقارانىڭ زارەسىن الدى. مەديتسينا تىلىمەن ونى مۋكورميكوز دەپ تە اتايدى.

قازىر بۇل كەسەلگە 9 مىڭعا جۋىق ءۇندى ازاماتى شالدىققان. ەڭ قيىنى اۋرۋى اسقىنعان ناۋقاستاردىڭ باسىم بولىگى كوز بەن مۇرىننان ايىرىلىپ جاتىر. ايماقتاعى دارىگەرلەر اۋرۋمەن كۇرەسكە قاجەتتى ءدارى- دارمەك جەتىسپەيتىنىن ايتادى. قازىر مەملەكەتتىك جانە جەكەمەنشىك كلينيكالاردا وسى دەرتكە شالدىققاندار سانى ارتىپ بارادى. اۋرۋدىڭ اسقىنۋىنا بايلانىستى 7 شتاتتا ەپيدەميا جاريالاندى. دىمكاس جانداردىڭ ەڭ كوبى گۋدجارات، ماحاراشترا پەن اندحرا- پرادەش شتاتتارىندا تىركەلىپ جاتىر.

ساراپشىلار اۋرۋدىڭ تارالۋىنا كوروناۆيرۋس تۇرتكى بولدى دەگەن بولجام ايتادى. ويتكەنى حالىقتىڭ يممۋنيتەتى كوروناۆيرۋس كەسىرىنەن السىرەپ كەتكەن. بۇعان قوسا جەرگىلىكتى كليمات اۋرۋدىڭ تارالۋىنا اسەرىن تيگىزىپ وتىر.

اليسا حەن- كەن تان، سەۋلدەگى دارىگەر:

- مۋكورميكوز وتە قاۋىپتى، ءارى سيرەك كەزدەسەتىن اۋرۋ. ىندەتتىڭ ءولىم كورسەتكىشى 50 پروتسەنتتەن جوعارى. زەڭ دەنەنىڭ كەز كەلگەن مۇشەسىنە شابۋى مۇمكىن. كوبىنەسە ول كوز بەن مۇرىندى زاقىمدايدى. قارا زەڭ ميعا نەمەسە سۇيەككە جەتسە وتە قاۋىپتى. اۋرۋدى الدىن الا انىقتاۋ دا قيىن. ناۋقاستاردىڭ كوبى دارىگەرلەردىڭ كومەگىنە تىم كەش جۇگىنەدى.

ءۇندىستاندا قارا زەڭنەن 200 دەن استام ادام كوز جۇمدى. اۋرۋ كوروناۆيرۋس ىندەتىنەن ساۋىققان ادامداردان انىقتالىپ جاتىر. ءقازىر ماماندار قارا زەڭنىڭ بەلەڭ الۋىنا ناقتى نە سەبەپ بولعانىن انىقتاۋعا كىرىستى.

انيل گويال، دارىگەر:

- بۇل ينفەكتسيالىق اۋرۋ ەمەس. ادامنان ادامعا جۇقپايدى. مۋكورميكوزبەن قانت ديابەتىنە شالدىققاندار، يممۋنيتەتى السىرەگەن ادامدار ءجيى اۋىرادى. ءتۇرلى زەڭ تۇرلەرى اۋرۋدىڭ قوزدىرعىشى بولىپ كەلەدى. ولار اسىرەسە توپىراقتا، وسىمدىكتە، شىرىگەن جەمىس- جيدەكتە كەزدەسەدى.

مۋكورميكوزدان بولەك ءۇندىستاندى كوۆيد دا قىسپاققا الدى. ۆيرۋس جۇقتىرعانداردىڭ سانى كۇن وتكەن سايىن ارتىپ بارادى. ءولىم- ءجىتىم كورسەتكىشى رەكوردتىق دەڭگەيگە جەتتى. جاعدايدى ءدارى- دارمەك پەن مەديتسينا قىزمەتكەرلەرىنىڭ تاپشىلىعى ودان بەتەر ۋشىقتىردى. ۇرەيى قاشقان حالىق اۋرۋحانالاردىڭ الدىندا ەرەۋىلدەتىپ جاتىر. چينناي قالاسىندا جينالعاندار بيلىكتەن ءدارى تالاپ ەتتى. الەۋمەتتىك اراقاشىقتىق ساقتالماسا دا نارازىلاردىڭ بارلىعى بەتتەرىن تۇمشالاپ العان. بيلىك اشۋعا بوي الدىرعانداردى تاراتۋ ءۇشىن پوليتسيانى جۇمىلدىردى.

ايتا كەتەيىك، ەلدە سوڭعى تاۋلىكتە كوروناۆيرۋستان 4,5 مىڭعا جۋىق ادام قازا تاۋىپ، بۇرىنعى كورسەتكىشتەردەن اسىپ ءتۇستى.

جاپونياداعى ەپيداحۋال دا ءماز ەمەس. وساكا قالاسىنداعى اۋرۋحانالاردا ورىن تاپشىلىعى بايقالا باستادى. شاھاردا ءبىر اپتا ىشىندە ناۋقاستار سانى 5 ەسەگە ارتىپ كەتكەن. ولاردىڭ دەنى كوروناۆيرۋستىڭ بريتاندىق شتامىن جۇقتىرعاندار. جۇمىسى كوبەيگەن دارىگەرلەر بيلىكتى وليمپيادا ويىندارىن وتكىزۋدەن باس تارتۋعا شاقىردى.

يۋدزي تودا، دارىگەر:

- ناۋقاستاردى قابىلداي المايتىن دەڭگەيگە جەتتىك. بۇل سۇمدىق جاعداي. بريتاندىق شتامم وتە تەز تاراپ بارادى. وليمپيادانى وتكىزۋ ءۇشىن ءبىز پاندەميانى تولىق جەڭگەن جوقپىز. دارىگەرلەر حالىقتىڭ جينالماۋىن قالايدى.

مالايزيا ۇكىمەتى دە كوروناۆيرۋس ىندەتىنىڭ دەندەپ كەتۋىنە بايلانىستى سانيتارلىق شەكتەۋلەردى ودان ءارى كۇشەيتىپ جاتىر. وتكەن اپتانىڭ باسىندا بۇل ەلدە ءۇشىنشى رەت لوكداۋن جاريالانعان. ەلدىڭ دەنساۋلىق ساقتاۋ مينيسترلىگىنىڭ مالىمدەۋىنشە، جانساقتاۋ بولىمدەرى 91 پروتسەنتكە تولعان. جاڭا ەرەجە بويىنشا حالىقتىڭ كوبى ۇيىندە جۇمىس ىستەۋى ءتيىس. دۇكەندەر مەن ساۋدا ورىندارىنىڭ جۇمىسى شەكتەلدى.

ەۋروپادا كارانتين تالاپتار كەرىسىنشە جەڭىلدەپ جاتىر. جۋىردا اۆستريالىقتارعا سوڭعى جارتى جىلدا العاش رەت شيپاجايعا بارۋعا رۇقسات بەرىلدى. ايماقتا قوناق ۇيلەر، مەيرامحانالار، ءدامحانالار مەن سپا- سالوندار جاپپاي اشىلىپ جاتىر. الايدا وعان كىرۋ ءۇشىن تۇرعىندار ۆاكسينالاۋ تۋرالى انىقتامانى نەمەسە كوروناۆيرۋس تەستىسىنىڭ تەرىس ناتيجەسىن كورسەتۋ كەرەك.

- ءبارىمىز وتە قيىن كەزەڭدى باستان كەشىردىك دەپ ويلايمىن. ءبىراق قازىر مەكەمەلەر اشىلا باستادى. بۇل قالىپتى ومىرگە ورالۋىمىزدىڭ ماڭىزدى قادامى. قۋانىشىمدا شەك جوق. ىندەتتەن ءبىرجولا قۇتىلامىز دەپ سەنەمىن.

چەحيادا بۇگىن شەكتەۋلەردى الۋدىڭ ەكىنشى كەزەڭى باستالدى. قوناقۇيلەر مەن جاتاقحانالار اشىلىپ جاتىر. سونداي- اق تەاترلار مەن كينوتەاتر قويىلىمدارىن كورۋ ءۇشىن عيمارات ىشىندە 50، اشىق دالادا 1000 ادامعا دەيىن جينالۋعا مۇمكىندىك بەرىلدى.

www.24.kz