نۇر-سۇلتاندا ۇلتتىق ات سپورتىنان رەسپۋبليكالىق جارىس ءوتتى

نۇر-سۇلتان. قازاقپارات - نۇر-سۇلتان قالاسىندا ات سپورتىنان رەسپۋبليكالىق جارىس ءوتتى، دەپ حابارلايدى قازاقپارات ەلوردا اكىمدىگىنىڭ رەسمي سايتىنا سىلتەمە جاساپ.

جارىستى مادەنيەت جانە سپورت مينيسترلىگى، اۋىل شارۋاشىلىعى مينيسترلىگى جانە نۇر-سۇلتان قالاسىنىڭ اكىمدىگى بىرگە ۇيىمداستىردى.

شارا «اتبەگىلەر مەن شاباندوزدار ۇيىمى» رەسپۋبليكالىق قوعامدىق بىرلەستىگى بەكىتكەن ات جارىسى كەستەسىنە سايكەس وتكىزىلدى.

«بۇگىنگى ۇلتتىق ات سپورتى شاراسى تاۋەلسىزدىكتىڭ 30 جىلدىعىنا وراي ۇيىمداستىرىلدى. بارلىق ۇيىمداستىرۋشىلارعا العىسىمدى جەتكىزگىم كەلەدى. وسىنداي ۇلتتىق سپورت تۇرلەرى دامي بەرسىن. ءبىز مادەنيەت جانە سپورت مينيسترلىگى ءاردايىم سپورت جارىستارىن قولدايمىز. بۇگىن ات جارىسقا جەر-جەردەن 70 كە جۋىق شاباندوز قاتىسۋدا. بارلىق قاتىسۋشىعا ساتتىلىك تىلەيمىن!» — دەدى مادەنيەت جانە سپورت مينيسترلىگىنىڭ سپورت جانە دەنە شىنىقتىرۋ ىستەرى كوميتەتىنىڭ ءتوراعاسى سەرىك ساپيەۆ.

اتالعان ءىس-شارادا ۆەتەرينارلىق رەگلامەنت ستاندارتىنىڭ تالاپتارىن ساقتاي وتىرىپ، جارىسقا قاتىسۋشىلاردى تەستىلەۋ ءۇشىن دوپينگ-باقىلاۋ جۇرگىزىلدى. جىلقىلاردان دوپينگ-باقىلاۋ تەست الۋ ءۇشىن ارنايى كوميسسيا قۇرىلعان.

«اتبەگىلەر مەن شاباندوزدار» - 2018-جىلدىڭ 20- جەلتوقسانىندا مەملەكەتتىك تىركەۋدەن وتكەن ارناۋلى ۇيىم. ونىڭ نەگىزگى ماقساتى — تەك دالاداعى بايگەلەردى ەمەس، بارلىق ەلدى مەكەندە، ونىڭ ىشىندە قالالارداعى يپپودروم جارىستارىن وتكىزۋ.

ايتا كەتەيىك، رەسپۋبليكالىق جارىس سانيتارلىق تالاپتاردى ساقتاي وتىرىپ ءوتتى.