قاراعاندىداعى ۆاكسينا زاۋىتى كۇنىنە نەشە دوزا ءوندىرىپ جاتىر
بۇل تۋرالى «قاراعاندى فارماتسيەۆتيكالىق كەشەنى» ج ش س باس ديرەكتورى سەرگەي بارون ونلاين باسپا ءسوز ءماسليحاتىندا ايتتى.
«قازىر كۇنىنە 1 سەريا شىعارامىز. ءبىر سەريا دەگەنىمىز - ءبىر كومپونەنتتىڭ 150 مىڭ دوزاسى دەگەن ءسوز. ءبىز ەكى اۋىسىممەن جۇمىس ىستەۋدى جولعا قويدىق. قازىر تۇنگى كەزەكتى ىسكە قوسىپ جاتىرمىز. وسى ايدا 1 ميلليون 200 مىڭ دوزا شىعاردىق. قازىر ول توپتاما ساپا بويىنشا تەكسەرۋدەن ءوتىپ جاتىر. مامىر ايىنىڭ سوڭىندا تاراتىلادى دەپ كۇتىپ وتىرمىز. ونىڭ الدىندا اقپان ايىنان بەرى 1,8 ميلليون دوزا شىعارعان بولاتىنبىز. ال ماۋسىم ايىندا 1,5 ميلليون دوزادان اسىرۋعا دايىنبىز»، - دەدى كاسىپورىن باسشىسى.
سەرگەي باروننىڭ ايتۋىنشا، دەنساۋلىق ساقتاۋ مينيسترلىگى قاراعاندىداعى ۆاكسينا زاۋىتىنان 5 ميلليون دوزا ۆاكسينا ساتىپ الۋ تۋرالى كەلىسىمشارت بەكىتكەن ەكەن.
«دەنسۋلىق ساقتاۋ مينيسترلىگىمەن 5 ميلليون دوزا شىعارۋ تۋرالى كەلىسىمشارت جاسالعان بولاتىن. ونى ۋاقىتىندا ورىنداۋعا تولىق مۇمكىندىگىمىز بار. ەگەر تاعى ءوندىرۋ كەرەك بولسا، كەلىسىمشارت اياسىندا ۇلعايتۋعا دايىنبىز»، - دەدى كومپانيانىڭ باس ديرەكتورى.
اۆتور: ەسىمجان ناقتىباي
