تۇركىستاندا قىزاناق پەن بۇرىشتان تابىلعان قاۋىپتى ۆيرۋس - فەرمەرلەر كومەك سۇرادى

تۇركىستان. قازاقپارات - تۇركىستان وبلىسىنداعى جىلىجايلاردان قىزاناق پەن بۇرىشتىڭ قاۋىپتى ۆيرۋسى انىقتالدى. بۇل جايىندا ق ر اۋىل شارۋاشىلىعى مينيسترلىگىنەن ءمالىم ەتتى، دەپ حابارلايدى قازاقپارات ءتىلشىسى.

وسى جايتقا بايلانىستى اۋىل شارۋاشىلىعى ءمينيسترى ساپارحان وماروۆتىڭ تاپسىرماسىمەن جاعدايدى ەگجەي- تەگجەيلى زەردەلەۋ ءۇشىن وڭىرگە اگروونەركاسىپ كەشەنىندەگى مەملەكەتتىك ينسپەكتسيا كوميتەتىنىڭ ءتوراعاسى المابەك مارس شۇعىل جەتتى.

المابەك مارس شاعىمدانىپ، كومەك سۇراعان تۇركىستاندىق فەرمەرلەرمەن كەزدەسۋ وتكىزدى. جۇمىس ساپارىنىڭ ناتيجەسىندە كوميتەت ءتيىستى شەشىم قابىلدايتىن بولادى. ايتا كەتەرلىگى، فيتوسانيتاريالىق كارانتيندىك باقىلاۋ ناتيجەسىندە وبلىستاعى ءۇش جىلىجاي شارۋاشىلىعىندا قىزاناق پەن بۇرىشتىڭ قاۋىپتى جوعارى پاتوگەندى كارانتيندىك ۆيرۋسى - قىزاناقتىڭ قوڭىر ءاجىم ۆيرۋسى (ToBRFV) انىقتالىپ وتىر. مۇنى پ ت ر- تالداۋلار نەگىزىندە «رەسپۋبليكالىق وسىمدىكتەر كارانتينى ورتالىعى» م م الماتى ايماقتىق كارانتيندىك زەرتحاناسى راستادى. ToBRFV - جابىق توپىراقتاعى كوكونىس داقىلدارىنىڭ قاۋىپتى پاتوگەنى. تارالۋ جىلدامدىعى جوعارى بولعاندىقتان، سوڭعى ەكى جىل ىشىندە ۆيرۋس ەۋروپا، ازيا جانە امەريكا ەلدەرىندە انىقتالىپ، جابىق جانە اشىق جەرلەردە قىزاناق وندىرىسىنە ۇلكەن زيان كەلتىرگەن.

ۆيرۋس جوعارى پاتوگەندى جانە ۇزاق ۋاقىت بويى تۇقىمدار مەن وسىمدىكتەردە عانا ەمەس، سونىمەن قاتار ينەرتتى بەتتەردە دە ومىرشەڭ بولىپ قالادى. قىزاناق پەن بۇرىش داقىلدارى ۆيرۋستان 70 پايىزعا دەيىن شىعىن بولادى.

ەستەرىڭىزگە سالا كەتسەك، ەلىمىزدىڭ فيتوسانيتاريالىق باقىلاۋ بەكەتتەرىندە وسىمدىكتەر كارانتينى بويىنشا باقىلاۋ كۇشەيتىلگەن. وسى جىلدىڭ 4 ايىندا ToBRFV جۇقتىرعان كوكونىس ونىمدەرىن (ازەربايجان – 17، تۇركىمەنستان – 19، يران – 6، ق ح ر – 2، تۇركيا – 8، وزبەكستان - 24) اكەلۋدىڭ 76 فاكتىسى انىقتالدى. بارلىق جۇك ەكسپورتتاۋشى ەلدەرگە قايتارىلىپ، تاۋار يەلەرى اكىمشىلىك جاۋاپكەرشىلىككە تارتىلدى.