جامبىل وبلىسىنداعى وقيعا: تاسقىن سۋ مالداردى اعىزىپ اكەتتى
كوكارىقتىقتار قاتتى نوسەر كەشكى بەستەر شاماسىندا باستالىپ، ارتى سەلگە ۇلاستى دەيدى. ايتۋلارىنشا، ساي- سالامەن جۇيتكي اققان تاسقىن سۋ جولداعىنى جايپاپ ءوتىپ، ەسكى كانالداردى قوقىسقا تولتىرىپ تاستاعان. سونىڭ كەسىرىنەن كوپىرلەر بىتەلىپ، تاۋ بوكتەرىندەگى التى اۋىلدى سۋ باسىپتى. ال ەكى كەش اراسىندا نە ىستەرىن بىلمەي دال بولعان حالىق ورىستەن قايتقان مالىن تاپپاي اۋرەگە تۇسكەن.
«ءبىرتالاي مايدا مال سۋعا اعىپتى. جوعارى جاقتا، قۇمارىقتا. وسى بالە جىلدا بولادى نەگىزى. وسىعان ءبىر امال بولادى ما، بولمايدى ما؟»، - دەيدى كوكارىق اۋىلىنىڭ تۇرعىنى جەكسەنتاي سۇيىنبايەۆ.
«اعايىن، ەل- جۇرت جينالىپ مىنا جەردى قازىپ، كۇشپەن ءبارىن اشىپ، سۋدى زورعا دەگەندە توقتاتتىق. بىلاي قاراي كەتتى. تۇنگى ساعات 11 گە دەيىن، 12 گە دەيىن سۋ سارىلداپ اعىپ جاتتى»، - دەدى كوكارىق اۋىلىنىڭ تۇرعىنى داريعا ابدىكەرىموۆا.
تۇرعىندار مۇنداي تابيعي اپاتتار ەكى- ءۇش جىلدا قايتالانىپ تۇرادى دەيدى. ايتۋلارىنشا، بۇل جولى دا كۇتكەن كومەك كەش كەلگەن. سونىڭ كەسىرىنەن، 11 ۇيگە سۋدىڭ زاردابى تيگەن.
«بۇدان بولەك جاۋىن سالدارىنان ورنەك اۋىلدىق وكرۋگىنە قاراستى كوپىرگە زاقىم كەلدى»، - دەدى جامبىل وبلىستىق ت ج د باسقارما باستىعى ورىنباسارىنىڭ مىندەتىن اتقارۋشى گۇلنار جامانتايەۆا.
قازىر تۇرعىندار بىرىگىپ قىزىل سۋ استىندا قالعان قورا- قوپسى، اۋلاسىن تازارتىپ جاتىر. ال ورنەكتىكتەر اۋىل ىرگەسىندەگى جالعىز كوپىرىن جوندەۋگە كىرىسىپتى. ازىرگە تابيعي اپات سالدارىنان كەلگەن شىعىن كولەمى بەلگىسىز.
