ساتبايەۆ تۇرعىنى وتادان كەيىن ىشىندە قالىپ قويعان داكەمەن ءبىر جىل جۇرگەن
ءبىر جىل بويى قىزۋى كوتەرىلىپ، قينالعان قاراعاندى وبلىسى ساتبايەۆ تۇرعىنىنىڭ بارماعان اۋرۋحاناسى قالماعان، دەپ حابارلايدى قازاقپارات ءتىلشىسى.
تالعات ەلۋبايەۆتىڭ ايتۋىنشا، وسىدان ءبىر جىل بۇرىن جەزقازعان اۋرۋحاناسىنىڭ دارىگەرلەرى بۇيرەگىندە تاس بار دەپ وتا جاساعان. ءبىراق بۇيرەككە وتا جاساعاننان كەيىن ونىڭ جاعدايى ۋشىعىپ كەتەدى. دارىگەرلەر وعان ينفەكسيا تۇسكەن دەپ تاعى وپەراتسيا جاساعان. الايدا اۋرۋ ودان سايىن اسقىنىپ كەتتى دەيدى. جانى قينالعان ازامات ەلوردانىڭ ءبىرىنشى اۋرۋحاناسىنا تۇسەدى. سوزىنشە، كەشە وتا جاساۋ كەزىندە دارىگەرلەر ونىڭ ىشىنەن داكە الىپ شىققان. «ىشىندە ءشىرىپ كەتكەن دەيدى. سونى الىپ شىقتى»، - دەيدى ناۋقاس تالعات ەلۋبايەۆ.
ونىڭ تۋىسى گۇلميرا ەلۋبايەۆا اعاسىن اۋىر حالگە تۇسىرگەن جەزقازعان دارىگەرلەرىن جازالاۋدى سۇرايدى. ايتۋىنشا، اق حالاتتىلاردىڭ كەسىرىنەن تالعات ەلۋبايەۆتىڭ دەنساۋلىعىنا ايتارلىقتاي زاقىم كەلگەن.
«ءبىزدىڭ جەزقازعاننىڭ بىلىعى. دارىگەرلەردىڭ سالعىرتتىعى وسىمەن ءبىر ەمەس، ەكىنشى رەت قايتالانىپ وتىر. ولار بۇيرەكتىڭ ءىشىن اشقان كەزدە بۇيرەك ساۋ بولىپ شىقتى. ونى قايتا جاپتى. سول جاپقاننان ينفەكتسيا ءتۇسىردى. ينفەكتسيانىڭ سوڭى وسىلاي ۋشىعىپ تۇر. استاناعا ەڭ سوڭعى ۇمىتىمىمىزبەن كەلىپ تۇرمىز، كەشە وسى قالالىق اۋرۋحانادا وپەراتسيا جاسالدى اعاما، ىشىنەن داكە جىبىمەن بىرگە شىقتى. سول ىرىڭدەپ كەتكەن. قانشا رەت ۋدز- عا ءتۇستى، نەگە بىلمەدى؟»، - دەيدى ناۋقاستىڭ تۋىسى گۇلميرا ەلۋبايەۆا.
ال جەزقازعان قالالىق ورتالىق اۋرۋحاناسىنان سۇحبات الۋ مۇمكىن بولمادى. ال قاراعاندى وبلىسىنىڭ دەنساۋلىق ساقتاۋ باسقارماسى وسى جاعدايعا قاتىستى تەكسەرۋ باستالعانىن جەتكىزدى.
