قۇتقارۋشىلاردىڭ ايلىعى قانشا؟

نۇر-سۇلتان. قازاقپارات - توتەنشە جاعدايلار ءمينيسترىنىڭ ەل الدىنداعى ەسەبى كەزىندە سۇڭگۋىر قۇتقارۋشىنىڭ اناسى قۇتقارۋشىلاردىڭ ايلىعىن ءوسىرۋ قانشالىقتى مۇمكىن ەكەنىن سۇرادى، دەپ حابارلايدى قازاقپارات.

«جالاقىنى كوتەرۋ تۋرالى ايتساق، قۇتقارۋشى سۇڭگۋىرلەر جەدەل-قۇتقارۋ جاساعىنداعى ازاماتتىق قىزمەتشىلەر ساناتىنا كىرەدى. 2019-جىلى وسى ساناتتاعى مامانداردىڭ ايلىعىن %30 دەيىن كوتەردىك. قازىر ورتاشا جالاقى - 170 مىڭ تەڭگە. مەن بۇل وتە از ەكەنىن تۇسىنەمىن. سوندىقتان جالاقىنى وسى ساناتتاعى قىزمەتكەرلەردىڭ دە ەڭبەكاقىسىن كەزەڭ-كەزەڭمەن كوبەيتۋ كوزدەلىپ وتىر. ءبىراق بۇدان بىلاي ايلىعى وسەتىن مامانداردى، اسىرەسە اسكەري شەنى بار سالا قىزمەتشىلەردى اتتەستاتتاۋدان وتكىزىپ وتىرامىز»، - دەدى يۋري يلين.

سونداي-اق، مينيستر ەسەپتىك كەزدەسۋدەن كەيىنگى قورىتىندى بريفينگىدە شىعىس قازاقستاننىڭ ريددەر قالاسىندا بولعان الاپات ءورتتى سوندىرۋشىلەردى ماتەريالدىق تۇرعىدا ىنتالاندىرۋ مۇمكىندىگى قاراستىرىلاتىنىن ايتتى.

«كەشە مەنىڭ بۇيرىعىممەن اتالعان ءورتتى سوندىرۋگە بەلسەندى قاتىسقان 14 ەرىكتى ماراپاتتالدى. ەرتەڭ ءبىز ريددەر قالاسىندا ءورت ماسەلەسىنە قاتىستى جەدەل كەڭەس وتكىزەمىز. ەگەر جەرگىلىكتى دەپارتامەنت باسشىلىعى جەكە قۇرامدى ىنتالاندىرۋعا ۇسىنسا، كوتەرمەلەۋ جاسايمىز»، - دەدى ۆەدومستۆو باسشىسى.

ەسكە سالساق، ريددەردە اۋقىمدى ءورت بولىپ، سالدارىنان ەكى ادام اۋرۋحاناعا ءتۇسىپ، 73 جاستاعى ايەل ادام كوز جۇمعان ەدى. رەسمي دەرەك بويىنشا ءتىلسىز جاۋ 283 گەكتار اۋماقتى شارپىعان .