الماتى زووباعىنداعى «كورىپكەل» مايمىل ءولىپ قالدى

الماتى. قازاقپارات - الماتى زووباعىنداعى «كورىپكەل» شيمپانزە قايتىس بولدى، دەپ حابارلايدى قازاقپارات ءتىلشىسى.

بۇل تۋرالى اقپارات الماتى زووباعىنىڭ Instagram پاراقشاسىندا پايدا بولدى.

«قۇرمەتتى دوستار! سىزدەر ءبىزدىڭ بارلىق جاعىمدى جاڭالىقتارىمىز بەن قۋانىشتارىمىزدى بىرگە ءبولىسىپ، ءاردايىم قولداۋ ءبىلدىرىپ كەلەسىزدەر. بۇل جولى قايعىلى جاعدايدى حابارلاعالى وتىرمىز. ونكولوگيالىق اۋرۋ سالدارىنان توميريس اتتى شيمپانزەمىز ءولىپ قالدى. كىشكەنتاي توميدى ەمدەۋ ءۇشىن الەمدىك دەڭگەيدەگى ەڭ بىلىكتى ۆەتەرينار ماماندار تارتىلدى. كەيدە مەديتسينانىڭ ءوزى اۋىر دەرتتىڭ الدىندا دارمەنسىز. ءبىز ءۇشىن بۇل اۋىر جاعداي بولدى. توميريستى بارلىق زووباق قىزمەتكەرلەرى مەن كەلۋشىلەر وتە جاقسى كوردى. ول وتە تالانتتى، شىعارماشىلىققا بەيىم جانۋار ەدى. تومي مۋزىكانى ەرەكشە ءسۇيىپ تىڭدايتىن. توميريس ءبىزدىڭ ويىمىزدا، جۇرەگىمىزدە ساقتالىپ قالادى»، - دەپ جازدى زووباق اكىمشىلىگى.

ايتا كەتەيىك، 2014 -جىلى الماتى زووباعىندا توميريسكە الەم كۋبوگىنىڭ فيناليستتەرى - گەرمانيا مەن ارگەنتينا قۇرامالارىنىڭ تۋىن ۇسىندى. ول گەرمانيا تۋىن تاڭدادى. ناتيجەسىندە نەمىستەر 1:0 ەسەبىمەن الەم كۋبوگىن جەڭىپ الدى. سودان بەرى ونى زووباق قىزمەتكەرلەرى مەن كەلۋشىلەر «كورىپكەل» تومي دەيتىن.

اۆتور: الما مۇقانوۆا