كورەيانىڭ قازاقستانداعى ەلشىسى قازاقستاندىقتاردى ۆاكسينا الۋعا شاقىردى
«بۇگىندە كوروناۆيرۋس ىندەتىمەن وڭتۇستىك كورەيا نەمەسە قازاقستان عانا ەمەس، بۇكىل الەم ەلدەرى بولىپ كۇرەسىپ جاتىر. ونىڭ ىشىندە وڭتۇستىك كورەيا ۆيرۋسپەن كۇرەسۋدى جەدەل قولعا العان الدىڭعى قاتارلى ەلدەردىڭ ءبىرى. قازىر ءبىزدىڭ ەلدە ۆاكسيناتسيا قارقىندى ءجۇرىپ جاتىر، حالقىمىز 50 ميلليون ادامدى قۇرايدى. بۇگىندە ەلىمىز ىندەتتىڭ تارالۋىن بولدىرماۋ، توقتاتۋ ماقساتىندا 150 ميلليون دوزا ۆاكسينا ازىرلەدى، بۇل دەگەنىمىز حالىق سانىنان 3 ەسەگە ارتىق»، - دەدى كۋ حونگ- سوك.
ودان ءارى، ەلشى ىندەتپەن كۇرەستە ۆاكسينا الۋدىڭ ماڭىزدى ەكەنىن العا تارتتى.
«ق ر پرەزيدەنتى قاسىم- جومارت توقايەۆ جانە ق ر دەنساۋلىق ساقتاۋ ءمينيسترى الەكسەي سوي مىرزا ۇنەمى ءوز سوزدەرىندە COVID-19-دى جەڭۋ جانە ونىڭ الدىن الۋدا ۆاكسينا الۋدىڭ ەرەكشە ءرولىن اتاپ وتەدى. مەن دە ۆاكسينانى قولداپ، ول كىسىلەردىڭ سوزىمەن تولىقتاي كەلىسەمىن. مەن وتباسىممەن جانە ەلشىلىك قىزمەتكەرلەرى قازاقستاندا كوروناۆيرۋسقا قارسى ۆاكسينانى العاشقىلاردىڭ ءبىرى بولىپ الدىق. ءبىز سول ءۇشىن العىس بىلدىرەمىز. وسى ورايدا قازاقستان حالقىنىڭ باسىم بولىگى ەكپە الىپ، قالىپتى ومىرگە ءساتتى ورالۋىمىزدى تىلەيمىن»، - دەدى ول.
بۇعان دەيىن حابارلاعانىمىزداي، بۇگىن وڭتۇستىك كورەيا ەلشىلىگى قازاقستاندىق دارىگەرلەرگە گۋمانيتارلىق كومەك كورسەتتى.
«الدىمەن ايتۋلى ءىس- شاراعا ۋاقىت ءبولىپ كەلگەندەرىڭىز ءۇشىن بارشاڭىزعا العىس بىلدىرەمىن. بۇگىنگى گۋمانيتارلىق كومەك «قايىرىمدى ىستەر مارافونى» اياسىندا كوروناۆيرۋس ىندەتىمەن كۇرەستە الدىڭعى شەپتە جۇرگەن مەديتسينا ماماندارىنا ارنالادى. دارىگەرلەردىڭ COVID-19 ىندەتىمەن كۇرەستەگى ەڭبەگى زور جانە ءبىز ۇسىنعان كومەك ءوز جاردەمىن تيگىزەدى دەپ ويلايمىز. ۆيرۋسپەن كۇرەس ماقساتىندا كورەيا رەسپۋبليكاسى قازاقستان رەسپۋبليكاسىمەن جان- جاقتى ىنتىماقتاستىقتا، بىرلەسىپ جۇمىس ىستەيدى. سونىڭ دالەلى وتكەن جىلى كورەي رەسپۋبليكاسى قازاقستان جانە دۇنيەجۇزىلىك دەنساۋلىق ساقتاۋ ۇيىمى بولىپ، بىرلەسىپ، ءۇشجاقتى كەلىسىم اياسىندا ءبىزدىڭ ەل قازاقستانعا 800 مىڭ دوللار كولەمىندە قارجى ءبولدى. ودان بولەك، بالالار مەن قارتتار ءۇيى، وسال توپقا جاتاتىن جاندارعا جانە ءبىلىم بەرۋ مەكەمەلەرىنە گۋمانيتارلىق كومەك جولداندى»، - دەدى كورەيا رەسپۋبليكاسىنىڭ قازاقستانداعى ەلشىسى كۋ حونگ- سوك.
سونداي- اق، ەلشى مىرزا ەكى ەل اراسىنداعى دوستىق ىنتىماقتاستىق ودان ءارى ءوز جالعاسىن تاباتىنىن العا تارتتى.
«بۇگىن كورەيا رەسپۋبليكاسىنىڭ قازاقستانداعى ەلشىلىگى ەلىمىزدىڭ 4 ايماعىنداعى 8 مەديتسينالىق مەكەمەگە گۋمانيتارلىق كومەك كورسەتىپ وتىر. ونىڭ قاتارىندا نۇر- سۇلتان قالاسى، قىزىلوردا، قوستاناي جانە پاۆلودار وبلىسى بار. گۋمانيتارلىق كومەك مەديتسينا قىزمەتكەرلەرىنە ارنالعان. اتاپ ايتقاندا، قورعانىش كوستيۋمى (كومبينەزون)، انتيسەپتيك، مەديتسينالىق قولعاپ جانە تاعى باسقا ۆيرۋستان قورعايتىن قۇرالدار بار»، - دەدى ق ر پارلامەنتى ءماجىلىسىنىڭ دەپۋتاتى، ۇلتتىق ۆولونتەرلەر جەلىسىنىڭ ءتوراعاسى ۆەرا كيم.
ونىڭ ايتۋىنشا، وڭتۇستىك كورەيا رەسپۋبليكاسى تاراپىنان گۋمانيتارلىق كومەك بۇعان دەيىن دە جۇزەگە اسىرىلدى جانە الداعى ۋاقىتتا تا ودان ءارى جالعاسىن تاباتىن بولادى.
