ەلوردا اۋەجايىندا جولاۋشىلار ءۇشىن جاڭا قىزمەت ءتۇرى پايدا بولدى

نۇر-سۇلتان. قازاقپارات - نۇرسۇلتان نازاربايەۆ اۋەجايىندا ۋاقىتىن ۇنەمدەگىسى كەلگەن جولاۋشىلار ءۇشىن «Fast track» اتتى جاڭا قىزمەت ءتۇرى ىسكە قوسىلدى، دەپ حابارلايدى قازاقپارات ءتىلشىسى.

«بۇل قىزمەت ءتۇرى بارلىق حالىقارالىق اۋەجايلاردا ۇسىنىلادى، ول كەزەكتە تۇرماي ۋاقىتىن ۇنەمدەگىسى كەلگەن جولاۋشىلارعا ارنالعان. ەندىگى ۋاقىتتا ءبىزدىڭ اۋەجايدا كەز كەلگەن جولاۋشى اقىسىن تولەپ، قول جۇگىمەن Fast track ارقىلى تەكسەرۋدەن جىلدام وتە الادى. نەگىزگى جۇك اتالعان قىزمەتتىڭ ىشىنە كىرمەيدى، تەك قول جۇگى. قازىرگى ۋاقىتتا Fast track ارقىلى تىركەلۋ Fly Arystan جانە Qazaq Air اۋە كومپانيالارىنىڭ جولاۋشىلارى ءۇشىن قولجەتىمدى»، - دەدى ەلوردا اۋەجايىنىڭ اتقارۋشى ديرەكتورى داۋلەت حامزين.

سونداي-اق، اۋەجاي باسشىسى باسقا اۋە كومپانيالاردىڭ اتالعان قىزمەتكە قوسىلماۋ سەبەبىن ايتا كەتتى.

«باسقا اۋە كومپانيالارى جولاۋشىلاردى تىركەۋ، تەكسەرۋ قىزمەتىن ءوز ەسەپتەرىنەن جۇرگىزەدى. سول سەبەپتى مەن ول باسقا اۋە كومپانيالاردىڭ جولاۋشىلارى الدىن الا كەلىپ تىركەلگەنى ءجون»، - دەيدى ول.

ونىڭ ايتۋىنشا، Fast track قىزمەتى ەرەسەك ازاماتتار ءۇشىن 4000 تەڭگە، 12 جاسقا دەيىنگى بالالار ءۇشىن 50 پايىز جەڭىلدىك، ال 0-دەن 2 جاس ارالىعىنداعى ءسابي ءۇشىن تەگىن. سونداي-اق، ەرەكشە كۇتىمدى قاجەت ەتەتىن جاندار ءۇشىن دە اتالعان قىزمەت تەگىن بولىپ تابىلادى. جانە جاڭا قىزمەت ءتۇرى بار-جوعى 3-5 مينۋت ۋاقىتتى الادى

اۆتور: ءالي يبرايەۆ