قىزىلوردادا پوليتسەيلەر ورتەنگەن پاتەر ىشىندە ەس-ءتۇسسىز جاتقان ايەلدى قۇتقاردى - ۆيدەو

وقيعا بۇگىن، 21-مامىردا ساعات تۇنگى 02.55-تە وبلىس ورتالىعىنداعى «اقمەشىت» شاعىناۋدانى №2 ءۇيدىڭ ەكىنشى قاباتىندا بولعان. ءدال سول ۋاقىتتا قىزىلوردا قالالىق پوليتسيا باسقارماسى پاترۋلدىك پوليتسيا باتالونىنىڭ جاياۋ باعىتتاعى قىزمەتكەرلەرى پوليتسيا كىشى لەيتەنانتى تالعات شالقاربايەۆ، اعا لەيتەنانتتار ەرجان انەپيايەۆ پەن بەكتۇر ساتەنوۆ الدىمەن توتەنشە جاعدايلار دەپارتامەنتىنە حابارلاسىپ، ودان كەيىن تۇرعىنداردى قۇتقارۋعا شۇعىل كىرىسكەن.

تالعات شالقاربايەۆ قىزىل جالىن كورشى پاتەرلەرگە تارالىپ كەتپەس ءۇشىن سوندىرۋگە كىرىستى. پوليتسەيلەر جەدەل شەشىم قابىلداپ، پاتەر ەسىگىن كۇش قولدانىپ اشتى. ول جەردە ەس- ءتۇسسىز جاتقان 54 جاستاعى ازاماتشانى دەرەۋ الىپ شىقتى. ال قالعان ەكەۋى كوپقاباتتى ءۇيدىڭ تۇرعىندارىن سىرتقا شىعاردى. ولاردىڭ اراسىندا بالالار دا بار.

«باعىت ارالاۋ كەزىندە جەرگىلىكتى تۇرعىن كوپقاباتتى ۇيلەردىڭ بىرىنەن ءورت شىققانىن ايتتى. ءبىز وقيعا ورنىنا دەرەۋ جەتتىك. ەكىنشى قاباتتا ورنالاسقان ءۇيدىڭ ەسىگىن بالتامەن بۇزىپ اشىپ، ەس- ءتۇسسىز جاتقان ايەلدى دالاعا شىعاردىق. ءورت سوندىرۋشىلەر مەن جەدەل جاردەم قىزمەتى دەرەۋ شاقىرتىلدى. كوپقاباتتى ءۇي تۇرعىندارى قاۋىپسىزدىگىنە بايلانىستى ولاردىڭ بارلىعىن سىرتقا شىعاردىق»، - دەپ، اتاپ ءوتتى پوليتسيا اعا لەيتەنانتى بەكتۇر ساتەنوۆ.