مۇقتاج بولساڭ - ال، جاعدايىڭ بولسا - سال: قاراعاندىلىقتار قايىرىمدىلىق اكسياسىن وتكىزدى

قاراعاندى. قازاقپارات - ءبىر اي بويى قاراعاندىلىق جاستار كومپانياسى «مۇقتاج بولساڭ - ال، جاعدايىڭ بولسا - سال» قايىرىمدىلىق اكتسياسىن وتكىزدى، دەپ حابارلايدى قازاقپارات ءتىلشىسى.

كۇن سايىن پريشاحتينسك سۋپەرماركەتتەرىنىڭ ءبىرىنىڭ جانىندا ازىق- تۇلىك داستارحانى جايىلادى. مۇندا «مۇقتاج بولساڭ - ال، جاعدايىڭ بولسا - سال» دەگەن حابارلاندىرۋ ىلىنگەن. كەز كەلگەن مۇقتاج ادام كەلىپ، قاجەتتى ونىمدەردى الا الادى. ال يگى ىسكە ءوز ۇلەسىن قوسقىسى كەلەتىندەردە بىردەڭە ساتىپ الىپ، ۇستەلگە قالدىرۋعا مۇمكىندىگى بولدى.

«اكسيا يدەياسىن ءبىزدىڭ قوردىڭ قىزمەتىن بۇرىننان باقىلاپ، كومەك كورسەتىپ كەلە جاتقان تانىس بالالار ايتتى. ولار ۇزاق ۋاقىت دايىندالدى، قاراجات جينادى، ازىق- تۇلىك ساتىپ الدى. ولار بۇل اكسيانىڭ نە ەكەنىن ادامدار ءتۇسىنۋى ءۇشىن ارنايى جادىناما جاسادى»، - دەيدى «وتزىۆ» قوعامدىق قورىنىڭ جەتەكشىسى الەكساندر كوروگودوۆ.

ۇستەلدەگى تاعامدار ءار ءتۇرلى بولادى: كۇرىش، قاراقۇمىق، گەركۋلەس، ماكارون، قانت، تۇز، ۇن، سۋ، قۇرما. الەۋمەتتىك جەلىلەردەن اكسيا تۋرالى ءبىلىپ، وعان كوكونىس پەن جەمىستەردى بولشەك ساۋدادا ساتۋمەن اينالىساتىن جاس كاسىپكەرلەر قوسىلدى. سوندىقتان ۋاقىت وتە كەلە ۇستەلدە الما، بانان، كيۆي پايدا بولدى. الەكساندر دا شەتتە قالمادى. ول قوردان اكسياعا قاراجات بەردى، وسىنداي قايىرىمدىلىق ءىس- شارالارىن قالاي ءساتتى وتكىزۋ كەرەكتىگى تۋرالى تاجىريبەسىمەن ءبولىستى.

«ۇستەلدىڭ جانىنان وتكەن قاراپايىم ادامدار ءۇشىن بۇل تاڭقالارلىق جايت بولدى. كوبىسى الدىمەن جىگىتتەر ازىق- تۇلىك ساتادى دەپ ويلادى. كوپتەگەن مۇقتاج ادامدار جاقىنداۋعا ۇيالعانىن كورۋگە بولادى. ءبىز ولاردى ءوزىمىز شاقىردىق، قاجەتتىسىن بەردىك»، - دەيدى «وتزىۆ» قورىنىڭ جەتەكشىسى.

بۇل اكسيا سوڭعى رەت وتكىزلىپ وتىرعان جوق. ەرىكتىلەر جەرلەستەرىنە كومەك كورسەتۋدى ءالى دە جالعاستىرماق. الەكساندردىڭ ايتۋىنشا، قايىرىمدىلىق ادامداردى مەيىرىمدى ەتەدى. قول ۇشىن بەرە الاتىندار مىندەتتى تۇردە قايعى- قاسىرەتكە دۋشار بولعان مۇقتاجدارعا كومەك كورسەتەدى.

«مەنىڭ قورىم سەگىز قايىرىمدىلىق اكتسياسىن وتكىزدى. سوڭعى شارا بارىسىندا ءبىز 40 وتباسىنا كومەك كورسەتتىك. ءبىر ايعا ازىق- تۇلىك ساتىپ الدىق. بۇل الەۋمەتتىك وسال توپقا جاتاتىن وتانداستارىن قولداعىسى كەلەتىن قاراپايىم ادامداردىڭ ارقاسىندا جۇزەگە اسادى. قاراعاندىلىقتارعا ايتارىم، شەتتە قالماڭىزدار، ءار تيىن مۇقتاج بالالاردىڭ، جالعىزباستى انالاردىڭ، مۇمكىندىگى شەكتەۋلى ادامداردىڭ كۇلكىسى مەن قۋانىشىنا سەبەپ بولۋى مۇمكىن»، - دەيدى الەكساندر كوروگودوۆ.