كۇندە كوفە ىشسە نە بولادى؟

نۇر- سۇلتان.قازاقپارات - جوعارى قان قىسىمى بار ادامدارعا كوفە ىشۋدەن باس تارتۋدىڭ قاجەتى جوق.

مەديتسينا عىلىمدارىنىڭ دوكتورى، پروفەسسور، كارديولوگ زاۋربەك شۋگۋشيەۆ كوفەنىڭ جۇرەك- قان تامىرلارى جۇيەسىنە جانە قان قىسىمى جوعارى ادامدارعا بۇل سۋسىننىڭ قالاي ىسەر ەتەتىنىن ايتتى.

كوفەنىڭ گيپەرتونيامەن اۋىراتىن ناۋقاستارعا تەرىس اسەرى ادەتتە قىسقا مەرزىمدى جانە شامالى عانا بولادى.

كوفە شىنىمەن قىسىمنىڭ جوعارىلاۋىنا اسەر ەتەدى، ءبىراق وتە قىسقا مەرزىمدە، ياعني ماكسيمالدى جارتى ساعاتقا دەيىن. ادەتتە قىسىم بىردەن كوتەرىلىپ كەتپەي، ازداپ كوتەرىلەدى.

سونىمەن قاتار كوفە جۇرەك- قان تامىرلارى جۇيەسىنە وڭ اسەر ەتەدى.

كوفە ءىشۋ جۇرەك- قان تامىرلارى اسقىنۋىنىڭ دامۋ قاۋپىن تومەندەتەتىنى دالەلدەنگەن. ويتكەنى، ادامدار قان قىسىمىنىڭ جوعارىلاۋىنان ەمەس، ونىڭ اسقىنۋىنان كوز جۇمادى، - دەپ ءتۇسىندىردى كارديولوگ.

مۇنداي باقىلاۋلار تەك تابيعي جاڭا ۇنتاقتالعان كوفەگە قاتىستى. سۋسىن پايدالى بولۋى ءۇشىن ونىڭ قۇرامىنا نازار اۋدارۋ كەرەك جانە ماماندار ۇسىنعان مولشەردەن اسپاۋى كەرەك.

كوفەنىڭ بارلىق پايدالى اسەرلەرى تەز ەريتىن كوفەگە ەمەس، جاڭا ۇنتاقتالعان كوفەگە قاتىستى.

ەگەر ءسىز 20 كەسە كوفە ىشسەڭىز، ارينە مۇنىڭ سوڭى جاقسىلىققا اپارمايتىنى ءمالىم. عالىمدار كۇنىنە ەكى- ءۇش كەسە كوفە ىشۋگە كەڭەس بەرەدى. بۇل شامامەن 400 ميلليگرامم.

دارىگەرلەر ادامنىڭ سالماعىنا بايلانىستى 50-دەن 180 ميلليگرامم كوفە ءىشۋدى ۇسىنادى.

65 جاستان اسقان ادامدار وستەوپوروزدىڭ دامۋىن بولدىرماس ءۇشىن سۋسىنعا ءسۇت قوسىپ ءىشۋى كەرەك.

65 جاستان اسقان ادامدار كوفەنى شامادان تىس ىشسە، سۇيەكتەن كالتسييدىڭ شايىلىپ شىعۋىنا ياعني وستەوپوروزدىڭ دامۋىنا اكەلۋى مۇمكىن.