ورازا ايىندا ءجيى قويىلعان ەسىمدەر

نۇر-سۇلتان. قازاقپارات - ورازا ايىندا ەلىمىزدە دۇنيەگە كەلگەن ۇل بالالارعا رامازان، ال قىز بالالارعا مەدينا ەسىمى ءجيى قويىلعان، دەپ حابارلايدى قازاقپارات ءتىلشىسى.

بيىل ورازا ايى 13-ساۋىردە باستالىپ، 12-مامىرعا دەيىن جالعاسقانى بەلگىلى. وسى ورايدا اتالعان ەكى ايدا ەلىمىزدە دۇنيەگە كەلگەن ۇل جانە قىز بالالارعا قانداي ەسىم ءجيى قويىلعانىن ءبىلۋ ماقساتىندا ق ر ستراتەگيالىق جوسپارلاۋ جانە رەفورمالار اگەنتتىگى ۇلتتىق ستاتيستيكا بيۋروسىنىڭ رەسمي سايتى دەرەكتەرىنە شولۋ جاساپ كورگەن ەدىك.

سونىمەن، ءساۋىر ايىندا دۇنيەگە كەلگەن 1175 ۇل بالاعا رامازان ەسىمى بەرىلگەن. جالپى بۇل ايدا ۇلدارعا ايسۇلتان (388)، ءاليحان (341)، نۇريسلام (325) جانە امير (212) ەسىمدەرى ءجيى قويىلعان. ال قىزدار اراسىندا مەدينا (585) ەسىمىنىڭ ءجيى قويىلعانىن بايقاۋعا بولادى. ۇزدىك بەستىككە رايانا (489)، ايشا (425)، ايلين (397)، ايزەرە (342) ەسىمدەرى كىرەدى.

ستاتيستيكالىق دەرەكتەردەن مامىر ايىندا دا رامازان (510)، ايسۇلتان (183)، ءاليحان (178)، نۇريسلام (156) ەسىمدەرى ءجيى بەرىلگەنىن بايقاۋعا بولادى.

دەگەنمەن، بۇل ايدا ۇلدارعا قويىلعان ۇزدىك 5 ەسىمنىڭ قاتارىنا الديار (94) كىرىپ وتىر. قىز بالاعا ەسىم قويۋدا العاشقى ۇزدىك تورتتىك وزگەرمەگەن. ياعني مەدينا (235)، رايانا (224)، ايشا (190)، ايلين (175) ەسىمدەرى ءجيى قويىلعان.

بۇل ايدا ۇزدىك بەستىككە اسىلىم ەسىمى دە كىردى. مۇنداي ەسىم 157 قىز بالاعا بەرىلگەن.

ايتا كەتەرلىگى، سوڭعى جىلدارى رامازان ايىندا دۇنيەگە كەلگەن سابيلەرگە جوعارىدا اتالعان ەسىمدەردىڭ ءجيى قويىلعانىن بايقاۋعا بولادى.

اۆتور: مارلان جيەمباي