گەموگلوبيندى قالاي كوتەرۋگە بولادى - دارىگەردىڭ جاۋابى

نۇر-سۇلتان.قازاقپارات - قان اينالىمى مەن جۇرەك جۇمىسىنا ىقپال ەتەتىن زاتتىڭ ءبىرى - گەموگلوبين. قانعا قىزىل رەڭك بەرەتىن دە - وسى.

ەل اراسىندا كوپ كەزدەسەتىن اۋرۋدىڭ ءبىرى - انەميا نەمەسە گەموگلوبيننىڭ ءتۇسىپ كەتۋى. اسىرەسە جۇكتى ايەلدەردە ءجيى كەزدەسەدى.

ەر ادامنىڭ اعزاسىندا گەموگلوبيننىڭ ورتاشا نورماسى - 130-160 ممول/ل، ال ايەلدىكى - 120-140 ممول/ل. ال 50 جاستان اسقان ەر ادامنىڭ گەموگلوبينى 117-138 ممول/ليتردەي بولادى.

گەموگلوبينى ءتۇسىپ كەتكەن ادام ونى جىلدام بايقايدى: تەرى قۇرعاپ اعارادى، جۇرەك قاعىسى جيىلەيدى، السىزدىك، شارشاۋ، ءتىسى سارعايادى، باشپايدىڭ بەتكى جاعى قارايۋى مۇمكىن، ۇيقى قاشادى، باس اۋىرادى، قۇلاق تۇنادى. شاش ءتۇسۋ مەن ءتىلدىڭ اعارۋى دا وسىعان جاتادى.

وسى بەلگىلەردى بايقاعاندار «گەموگلوبينىم ءتۇسىپ كەتكەن سياقتى»، «گەموگلوبيندى كوتەرۋ كەرەك» دەگەن ءسوزدى ءجيى ايتادى. ەندەشە گەموگلوبيندى نورماسىندا ۇستاپ، ءتۇسىپ كەتكەن جاعدايدا كوتەرۋ ءۇشىن نە ىستەۋ كەرەك. بۇل ساۋالدىڭ جاۋابىن ا. سىزعانوۆ اتىنداعى ۇلتتىق عىلىمي حيرۋرگيا ورتالىعىنىڭ كارديولوگ دارىگەرى راشيدا حاليمنازاروۆادان بەردى.

دارىگەردىڭ ايتۋىنشا، ەڭ الدىمەن ادام گەموگلوبيندى كوتەرۋگە كىرىسپەس بۇرىن ونىڭ نەگە ءتۇسىپ كەتكەنىن انىقتاۋعا تىرىسۋ كەرەك.

«سەبەبىن انىقتاعاننان كەيىن بارىپ، ونى كوتەرۋدى ويلاستىرۋ قاجەت. سەبەبى ادام اعزاسىندا گەموگلوبيننىڭ جايدان- جاي ءتۇسىپ كەتۋى مۇمكىن ەمەس. قانداي دا ءبىر اۋرۋدىڭ سەبەبىنەن گەموگلوبين ءتۇسۋى مۇمكىن. مۇندايدا ونى قانشا كوتەرۋگە تىرىسساق تا كوتەرە المايمىز. الدىمەن اۋرۋدى ەمدەپ الۋ كەرەك»، - دەيدى كارديولوگ.

گەموگلوبيندى كوتەرۋدىڭ بىردەن- ءبىر جولى - ول دۇرىس تاماقتانۋ.

اسىرەسە اقۋىزى مەن تەمىرى مول ەت، تەڭىز تاعامدارىن، ءداندى- داقىل مەن كوك ءشوپ جەۋ كەرەك. وكپە- باۋىردا تەمىر كوپ بولادى. ەتتىڭ قۇرامىنداعى تەمىردىڭ ۇلەسى 28 پايىزعا دەيىن جەتەدى. كوك الما مەن اناردا تەمىر كوپ. ءجيى جەڭىز. شىرىن جاساپ ىشۋگە بولادى. قىزاناق، كارتوپ، اسقاباق سىندى كوكونىستە دە تەمىر مول. وسىلاردى ارالاستىرىپ كوپ تۇتىنعان ءجون. سونىمەن بىرگە دارىگەر تەمىر قۇرامى جاقسى ارنايى پرەپاراتتار جازىپ بەرۋى مۇمكىن، - دەيدى راشيدا حاليمنازاروۆا.

massaget.kz