كوروناۆيرۋسقا قارسى زارارسىزداندىرۋ نە سەبەپتى جۇرگىزىلمەيدى
«بىلتىر كوروناۆيرۋس پاندەمياسى پايدا بولعاندا ۆيرۋستىڭ تارالۋ جولدارى ناقتى زەرتتەلمەگەن ەدى. سوندىقتان دۇنيەجۇزىلىك دەنساۋلىق ساقتاۋ ۇيىمىنىڭ ۇسىنىسىنا وراي زارارسىزداندىرۋ جۇمىستارى ءجيى جۇرگىزىلدى. ول تەك قازاقستاندا ەمەس، الەم ەلدەرىندە ورىن الدى. 2020-جىلى مينيسترلىك كوروناۆيرۋستىڭ بەلگىسىز ۆيرۋس بولۋىنا بايلانىستى ادامدار كوپ جينالاتىن ورىنداردى، ايالدامالاردى، قوعامدىق كولىكتەردى زارارسىزداندىرۋ، زارارسىزداندىرۋ تۋننەلدەرىن ورناتۋ شەشىمىن قابىلدادى»، - دەدى ءبىرىنشى ۆيتسە-مينيستر ورتالىق كوممۋنيكاتسيالار قىزمەتىندە وتكەن باسپا ءسوز ءماسليحاتى بارىسىندا.
ونىڭ اتاپ وتۋىنشە، بۇگىندە جۇرگىزىلگەن زەرتتەۋ ناتيجەلەرى مۇنداي ءىس-شارالاردىڭ تيىمدىلىگى تومەن ەكەندىگىن كورسەتكەن.
«وسىعان وراي مينيسترلىك عيماراتتاردى، كوشەلەردى، قوعامدىق ورىنداردى زارارسىزداندىرۋدان باس تارتۋ تۋرالى شەشىم قابىلدادى. بۇل دۇنيەجۇزىلىك دەنساۋلىق ساقتاۋ ۇيىمىنىڭ ۇسىنىسىنا ساي كەلەدى»، - دەدى مارات شورانوۆ.
