قازاقستاندىق ۆاكسينانىڭ ارتىقشىلىعى قانداي - مامان جاۋابى

الماتى. قازاقپارات - الماتى فتيزيوپۋلمونولوگيا ورتالىعىنىڭ جۇقپالى اۋرۋلار ءبولىمىنىڭ مەڭگەرۋشىسى، ينفەكسيونيست، پۋلمونولوگ ابزال مالباسقانوۆ قازاقپارات تىلشىسىنە قازاقستاندىق ۆاكسينانىڭ ارتىقشىلىقتارى تۋرالى ايتىپ بەردى.

- رەسپيراتورلىق ۆيرۋستىق ينفەكسيا مەن سوزىلمالى اۋرۋلاردىڭ ءورشۋى كەزىندە كوروناۆيرۋسقا قارسى ۆاكسينا سالدىرۋعا بولا ما؟

- ۆاكسينا اعزاعا، يممۋندىق جۇيەگە قاجەت. ەگەر اعزادا قانداي دا ءبىر قابىنۋ پروتسەسى بولسا، وزگەرىستەر بايقالىپ جاتسا، وندا ۆاكسيناتسيا جاسالماۋى كەرەك. بۇل ورگانيزمگە قوسىمشا جۇكتەمە اكەلۋى مۇمكىن. دەنساۋلىعى جاقسارعانان كەيىن سالدىرۋعا ابدەن بولادى. مىسالى، ءجىتى رەسپيراتورلىق ۆيرۋستىق ينفەكسيادان تولىق جازىلعان سوڭ سالدىرۋ قاجەت دەپ ويلايمىن. قارت كىسىلەر ۆاكسيناتسيانىڭ الدىندا دارىگەردەن كەڭەس الۋى ءتيىس. جاستارعا كەلەتىن بولساق، دەنساۋلىقتارى جاقسى بولسا، نەگە ۆاكسينا الماسقا.

- ۆاكسيناتسيادان بۇرىن انتيدەنەگە جانە كوروناۆيرۋسقا پ ت ر تاپسىرۋ كەرەك پە؟

- ەگەر ادامنىڭ جۇقتىرعان ناۋقاسپەن بايلانىسى بولماسا، ارينە، پ ت ر تەستى قاجەت ەمەس. ەگەر ادام وتكەن جىلى نەمەسە جاقىندا اۋىرعان بولسا. بۇل جاعدايدا وعان انتيدەنەلەردىڭ بولۋىن انىقتاۋ ءۇشىن يممۋنوفەرمەنتتىك تالداۋ (ي ف ت) جاساتقانى دۇرىس. ەگەر انتيدەنەلەر از تيتردە بولسا نەمەسە مۇلدەم بولماسا، وندا ي ف ت تەستىن وتكىزىپ، سودان كەيىن ەكپە سالدىرۋ كەرەك. وتباسىندا ءبىر ادام اۋىرىپ قالسا، ەكىنشىسى ءوزىن-ءوزى قورعاۋ ءۇشىن ۆاكسينا سالدىرۋعا جۇگىرەدى. ونداي جاعدايلار بار. بۇل كەزدە ادام ينفەكسيانى جۇقتىرىپ الۋى دا مۇمكىن. كەيىن، كوروناۆيرۋس انىقتالعاندا ۆاكسينادان كەيىن اۋىردىم دەپ ايتادى. مۇنداي جاعدايدا الدىمەن پ ت ر تەست جاساتىپ 7-14 كۇن وتكەنىن كۇتكەن دۇرىس، ەگەر ءبارى جاقسى بولسا، ۆاكسينا سالدىرۋعا بولادى.

- قازاقستاندىق ۆاكسينانىڭ ارتىقشىلىقتارى قانداي؟

- بىرىنشىدەن، ءبىز ءوز ۆاكسيناسىن شىعارعان ەلمىز. مۇنىڭ ءوزى ايتارلىقتاي جەتىستىك. قازاقستاندا عىلىمنىڭ ۇلكەن قورى بار. كوروناۆيرۋسقا قارسى ۆاكسينا جاسالعان ينستيتۋتتا بۇعان دەيىن تالاي ەكپە دايىندالعان. ول ۆاكسينانى بىرنەشە ۇرپاق الدى. شۇكىر. ءبارىمىز امان-ساۋ ءجۇرمىز. قازاقستاندىق كوروناۆيرۋسقا قارسى ۆاكسينا مەحانيزمى دالەلدەنگەن تاسىلمەن جاسالدى. ول كوروناۆيرۋس ينفەكسياسىن تۋدىرۋى مۇمكىن ەمەس. الدىمەن، ەۋروپالىق ۆاكسينالاردى الايىق، ولاردى مۇزداتقىشتا -70 گرادۋس تەمپەراتۋرادا تاسىمالداۋ كەرەك. ەگەر جاقىن ەلدەردەن كەلەتىن ۆاكسينا تۋرالى ايتاتىن بولساق. بۇل سول «سپۋتنيك- V»، ونى -18 گرادۋس تەمپەراتۋرادا تاسىمالداۋعا بولادى. ياعني، قاراپايىم توڭازىتقىشتا.

ءبىزدىڭ ۆاكسينانىڭ ارتىقشىلىعى نەدە؟ وتاندىق ۆاكسينا جاسۋشالىق يممۋنيتەتتى قاۋىپسىز تۇردە قوزدىرادى. ونى ارنايى توڭازىتقىشتا ساقتاۋدىڭ قاجەتى جوق. ەكپەنى جەتكىزۋ ءۇشىن كۇردەلى قوندىرعىلار قولدانىلمايدى. تەمپەراتۋراسى 2-8 گرادۋستىق تەحنيكانىڭ بولعانى جەتكىلىكتى. «QazCovid-in» ءوز حالقىن قامتاماسىز ەتۋ ءۇشىن جاڭا عانا شىعارىلدى.

- اڭگىمەڭىزگە راحمەت!

اۆتور: الما مۇقانوۆ