ءبىلىم جانە عىلىم ءمينيسترى مۇعالىمدەردى جۇمىسقا كونكۋرس ارقىلى قابىلداۋ تۋرالى ايتتى

نۇر-سۇلتان. قازاقپارات - ءبىزدىڭ باستى ماقساتىمىز - قازاقستاندىق ءبىلىم مەن عىلىمنىڭ الەۋەتىن بارىنشا كۇشەيتۋ ءۇشىن «جاستىق پەن تاجىريبەنىڭ ۇيلەسىم تابۋىن» قامتاماسىز ەتۋ.

بۇل تۋرالى ءبىلىم جانە عىلىم ءمينيسترى اسحات ايماعامبەتوۆ جەلىدەگى پاراقشاسىندا جازدى، دەپ حابارلايدى قازاقپارات.

«جاڭا كوزقاراسى بار جاس كادرلاردى جۇمىسقا قابىلداي وتىرىپ، تەپە- تەڭدىك پەن ۇرپاقتار ساباقتاستىعى ساقتالاتىن بولادى. مينيسترلىك تاراپىنان ىسكە اسىرىلىپ جاتقان كادرلىق ساياسات تۋرالى قوعامدا نەعۇرلىم تولىق جانە وبەكتيۆتى تۇسىنىك قالىپتاستىرۋ ماقساتىندا الداعى بىرنەشە اپتانىڭ ىشىندە جاڭادان تاعايىندالعان باسشىلار كىشىگىرىم سۇحبات بەرەدى.

سۇحبات بارىسىندا جاس كوشباسشىلار باسقارىپ وتىرعان ۇيىمدارىن ودان ءارى دامىتۋ بويىنشا جۇمىس جوسپارىن (1)، جۇزەگە اسىرىلاتىن نەگىزگى رەفورمالار (2)، جۇمىس جوسپارىن ىسكە اسىرۋ ءۇشىن جۇيەگە تارتىلاتىن رەسۋرستار (3) جانە جاڭا باسشىنىڭ تاعايىندالۋىنان باستاپ ۇيىمنىڭ الداعى ۋاقىتقا جوسپارلانعان جۇمىس ناتيجەلەرىمەن (4) بولىسەتىن بولادى. سونىمەن قاتار بۇل جۇمىستى جۇيەلى تۇردە جالعاستىرۋ ءۇشىن جاقىن ارادا ءبىز جاڭا جوبا باستايتىن بولامىز. اتاپ ايتسام، «كادرلىق رەزەرۆ» جوباسى. ءبىز ءبىلىم جانە عىلىم جۇيەسىندە باسشىلىق لاۋازىمعا ۇسىنۋ ءۇشىن تابىستى ءارى دايىندىعى مىقتى ۇمىتكەرلەردى ىرىكتەۋدى جوسپارلاپ وتىرمىز»، - دەدى مينيستر.

جوبا بويىنشا ىرىكتەۋ شارتتارى مەن ءتارتىبى تۋرالى اقپارات جەكە جاريالانادى.

«بۇدان بولەك جاقىن ارادا ءبىزدىڭ باستامامىزبەن جۇزەگە اسىرىلاتىن ديرەكتورلاردى روتاتسيالاۋ ينستيتۋتى، ولاردى تاعايىنداۋدىڭ جاڭا قاعيدالارى جانە مۇعالىمدەردى جۇمىسقا كونكۋرس ارقىلى قابىلداۋدىڭ جاڭا جۇيەسىن ەنگىزەتىن نورمالار جۇزەگە اسىرىلا باستايدى»، - دەپ ءتۇيدى مينيستر.

ەسكە سالساق، بۇعان دەيىن اسحات ايماعامبەتوۆ كەز-كەلگەن سالانىڭ سەرپىندى دامۋىن قامتاماسىز ەتۋ ءۇشىن باسقارۋشى ەليتانى ۇنەمى جاڭارتىپ وتىرۋ قاجەتتىگى تۋرالى ايتتى.

اۆتور: رۋسلان عابباسوۆ