ءۇندى شايى قىمباتتاۋى مۇمكىن

نۇر- سۇلتان. قازاقپارات - ءۇندىستانداعى ەپيداحۋالدىڭ ۋشىعۋىنا بايلانىستى ءۇندى شايىنىڭ قۇنى قىمباتتاۋى مۇمكىن.

ويتكەنى كوروناۆيرۋس ىندەتى ءوندىرىسى بويىنشا الەمدەگى ەڭ ءىرى شاي وسىرەتىن اسسام شتاتىنىڭ 90 پلانتاتسياسىندا تەز تاراپ بارادى. پلانتاتسيالاردا 500-دەن استام ادام ۆيرۋس جۇقتىرعان. ماماندار جاعداي وڭالماسا شاي ءونىمى ۋاقىتىلى جينالماي قالۋى مۇمكىن دەپ دابىل قاعادى. ەسەسىنە ونىڭ نارىقتاعى قۇنى دا شارىقتاپ كەتۋى مۇمكىن.

ساراپشىلار كوروناۆيرۋس ىندەتىنەن بولەك وڭىردەگى قۋاڭشىلىق تا جاعدايدى قيىنداتىپ تۇرعانىن العا تارتادى. ايتا كەتەيىك، ەلدە ۆيرۋس ءالى دە دەس بەرمەي تۇر. ەلدە ءبىر كۇندە 300 مىڭنان استام ناۋقاس تىركەلگەن. پاندەميا باستالعالى ءۇندىستاندا 24 ميلليون استام ادام دەرتكە شالدىققان. ال كەسەلدەن كوز جۇمعانداردىڭ قاتارى 270 مىڭنان استى.

www.24.kz