سوزىلمالى اۋرۋى بار ادامدارعا ۆاكسينا سالدىرۋعا بولا ما

الماتى. قازاقپارات - الماتى قالالىق قوعامدىق دەنساۋلىق باسقارماسى باسشىسى ورىنباسارىنىڭ مىندەتىن اتقارۋشى لاۋرا مىرزاعالي ونلاين بريفينگتە سوزىلمالى اۋرۋى بار ادامدارعا ۆاكسينا سالۋعا بولاتىنىن ايتتى، دەپ حابارلايدى قازاقپارات ءتىلشىسى.

سپيكەردىڭ ايتۋىنشا، ۆاكسينا سالۋعا قاتىستى قارسى كورسەتىلىمدەر كوپ ەمەس.

«سوزىلمالى اۋرۋى بار ادامدار كوپ، الايدا ولارعا ۆاكسينا سالۋعا بولمايدى دەگەن ءسوز ەمەس. ەگەر اۋرۋ اسقىنىپ تۇرماسا ەكپە ەگۋگە ابدەن بولادى. ءتىپتى اۋتويممۋندى اۋرۋلارمەن اۋىراتىندارعا دا ۆاكسينا سالۋعا بولادى. تەك مۇنىڭ بارلىعىن دۇرىس جەتكىزىپ، دۇرىس ءتۇسىندىرىپ، دۇرىس اقپارات بەرۋ كەرەك»، - دەدى لاۋرا مىرزاعالي.

سونىمەن قاتار، ول ەگۋ پۋنكتەرىندە ۆاكسينانىڭ ءۇش ءتۇرى بار ەكەنىن اتاپ ءوتتى. تۇرعىندار وزدەرى قالاعان ەكپەنى سالدىرتا الادى.

اتاپ ايتساق، قازاقستاندىق «QazVac»، قىتايدىڭ «Sinopharm» جانە رەسەيلىك «سپۋتنيك- V».

اۆتور: الما مۇقانوۆا