الماتىدا ۆاكسينالاۋ جۇمىستارى قالاي ءجۇرىپ جاتىر

الماتى. قازاقپارات- الماتى قالالىق قوعامدىق دەنساۋلىق ساقتاۋ باسقارما باسشىسىنىڭ ورىنباسارى مىندەتىن ۋاقىتشا اتقارۋشى لاۋرا مىرزاعالي ونلاين بريفينگ بارىسىندا حالىققا ۆاكسينا سالۋ جۇمىسى قالاي جۇرگىزىلىپ جاتقانىن ايتىپ بەردى، دەپ حابارلايدى قازاقپارات ءتىلشىسى.

ونىڭ ايتۋىنشا، ۆاكسيناتسيالاۋ ءۇشىن مەديتسينالىق ۇيىمداردا، مەكتەپتەردە، مادەنيەت ورىندارىندا، بازارلار مەن قالانىڭ ساۋدا ورتالىقتارىندا 200-دەن استام ەگۋ پۋنكتى ىسكە قوسىلعان، سونداي-اق كوشپەلى پۋنكتتەر دە جۇمىس ىستەيدى. قالاداعى 214 ۆاكسينا پۋنكتىندە 1282 مەديتسينا قىزمەتكەرىنەن قۇرالعان 315 بريگادا بار.

«بۇگىنگى كۇنى بارلىعى 270568 ادام ۆاكسينا سالدىردى. ونىڭ ىشىندە 19435 ى قۇقىققورعاۋ ورگانى قىزمەتكەرلەرى، 27 مىڭنان استام مەديتسينا ماماندارى، تاعى 20 مىڭداي پەداگوگ ۆاكسينا الدى. وعان قوسا ديسپانسەرلىك ەسەپتە تۇرعاندار مەن ستۋدەنتتەر، زەينەتكەرلەر، 60 جاستان اسقان ادامدار جانە قالا تۇرعىندارى ءوز ەرىكتەرىمەن ۆاكسينا سالىدىرۋدا»، - دەدى ول.

سونىمەن قاتار ول 9 ترانش بويىنشا قالاعا ۆاكسينانىڭ 302985 دوزاسى جەتكىزىلگەنىن ايتتى.

«جالپى كولەم بويىنشا وتاندىق QazVac ۆاكسيناسىنىڭ ءبىرىنشى ترانشى 3 مىڭ دوزانى قۇرايدى، قىتايلىق Sinopharm ۆاكسيناسىنىڭ العاشقى جەتكىزىلىمى 15 مىڭ دوزا. قالادا ءبىرىنشى كومپونەنت بويىنشا 37417 دوزا، ال ەكىنشى كومپونەنت بويىنشا 78444 دوزا بار»، - دەدى لاۋرا مىرزاعالي.