مەكتەپتەردە مامانداندىرىلعان كۇزەت مىندەتتى تۇردە بولادى – ءى ءى م

نۇر-سۇلتان. قازاقپارات - قازاقستان مەكتەپتەرىندە مامانداندىرىلعان كۇزەت مىندەتتى تۇردە بولادى.

بۇل تۋرالى ق ر ءى ءى م اكىمشىلىك پوليتسيا كوميتەتىنىڭ ءتوراعاسى مۇرات بايمۇقاشەۆ ءمالىم ەتتى، دەپ حابارلايدى قازاقپارات ءتىلشىسى.

«بۇگىندە ءبىلىم بەرۋ ۇيىمدارىنىڭ باسىم بولىگى تەرروريستىك تۇرعىدا ءالسىز نىساندار ساناتىنا جاتقىزىلعان. مامىر ايىنىڭ باسىندا ۇكىمەت قاۋلىسىمەن مۇنداي نىسانداردى انتيتەرروريستىك قورعاۋدىڭ جاڭا تالاپتارى بەكىتىلدى. ەگەر بۇعان دەيىن مۇنداي تالاپتار ۇسىنىس سيپاتىندا بولسا، ەندى ءبىلىم بەرۋ نىساندارى باقىلاۋ جۇيەسىمەن، قىزمەتكەرلەر مەن كەلۋشىلەردى حابارلاندىرۋ قۇرالدارىمەن، «دابىل» تۇيمەشەگىمەن، مامانداندىرىلعان كۇزەتپەن، وتكىزۋ جۇيەلەرىمەن مىندەتتى تۇردە جابدىقتالۋى ءتيىس»، - دەدى كوميتەت ءتوراعاسى ىشكى ىستەر مينيسترلىگىندە وتكەن باسپا ءسوز ءماسليحاتى بارىسىندا.

ونىڭ اتاپ وتۋىنشە، ەلىمىزدىڭ ءبىلىم جانە عىلىم مينيسترلىگى ءتيىستى نۇسقاۋلىق ازىرلەپ جاتىر. «سونىمەن قاتار ول تەرروريستىك قاۋىپ تۋىنداعان جاعدايدا پەداگوگتار مەن وقۋشىلاردىڭ ءىس- ارەكەتىنىڭ جان- جاقتى ءتارتىبىن قامتيدى»، - دەدى مۇرات بايمۇقاشەۆ.

ەسكە سالا كەتەيىك، 11-مامىردا تاتارستاننىڭ قازان قالاسىنداعى مەكتەپتە بەلگىسىز ەكى ادام وق جاۋدىرعان بولاتىن. اتىس كەزىندە 8 ادام قازا تاۋىپ، تاعى 21 ى زارداپ شەكتى. وسى وقيعاعا بايلانىستى مەملەكەت باسشىسى قاسىم-جومارت توقايەۆ رەسەي فەدەراتسياسىنىڭ پرەزيدەنتى ۆلاديمير پۋتينگە كوڭىل ايتتى. تاتارستان پرەزيدەنتى رۋستام ميننيحانوۆ 12-مامىردى رەسپۋبليكادا ازا تۇتۋ كۇنى دەپ جاريالادى.