وزگە ەلدەردە قارۋ ساتىپ الۋ وڭاي ما؟

نۇر-سۇلتان. قازاقپارات - الەمدە قارۋ- جاراقتى ساتىپ الۋ مەن ونى قولدانۋ شارتتارى ءارتۇرلى. بۇل تۋرالى تولىعىراق «الەم» باعدارلاماسىندا ايتىلادى.

رەسەيدە اڭ اۋلاۋ نەمەسە ءوزىن- ءوزى قورعاۋ ءۇشىن ساتىپ الۋعا بولادى. ءبىراق ەكى جاعدايدا دا ازاماتتاردىڭ جۇيكە اۋرۋىنا شالدىقپاعانى مەن ەسىرتكىگە سالىنباعانى تەكسەرىلەدى. قۇجاتتار تولتىرىلىپ، ارنايى ورگانعا جىبەرىلگەن سوڭ عانا قارۋ ساتىپ الۋعا قۇقىلى.

ال دۇنيەجۇزىندە حالىق سانىنا شاققاندا قارۋدى ەڭ كوپ يەلەنۋشى مەملەكەت سانالاتىن ا ق ش- تا قارۋ ەمىن- ەركىن ساتىلادى. زاڭ كونستيتۋتسيانىڭ 2-بابىمەن قورعالعان. ءبىراق قالاعان قارۋدى الار كەزدە ارنايى انكەتا تولتىرىپ، دەنىڭىز ساۋ، قىلمىس اتاۋلىدان تازا ەكەنىڭىزدى كورسەتۋىڭىز كەرەك. ال وسى ەلدىڭ كورشىسى كانادادا قارۋ ەركىن ساتىلعانىمەن، مىندەتتى تۇردە تىركەلەدى. جانە قارۋ ءۇش ساناتقا ءبولىنىپ، ادامعا قاۋىپ توندىرەدى دەگەن تاپانشا- اۆتوماتتاردى قاراپايىم ازاماتتاردىڭ يەلەنۋىنە تىيىم سالىنعان.

گەرمانيادا 2002 -جىلعى زاڭعا سايكەس، قارۋدى اڭشىلار نەمەسە سپورتتىق- قارۋ ۇيىمدارى عانا ساتىپ الا الادى. ال فرانتسيادا قارۋ 4 كاتەگورياعا ءبولىنىپ، ازاماتتارعا اۆتوماتتى جانە اسكەري قارۋ يەلەنۋىنە تىيىم ەنگىزىلگەن. قالعان قارۋ تەك ارنايى رۇقساتپەن بەرىلەدى.

www.24.kz