الماتى وبلىسىندا ءۇيىن ساعىنىپ، اسكەردەن قاشىپ كەتكەن سارباز ۇستالدى

تالدىقورعان. قازاقپارات - الماتى وبلىسىندا اسكەردەن قاشىپ كەتكەن قاتارداعى جاۋىنگەر ۇستالدى. شىعىس قازاقستان وبلىسىنىڭ تۋماسى ءۇيىن ساعىنعاندىقتان وسىنداي ارەكەتكە بارعانىن تۇسىندىرگەن، دەپ حابارلايدى قازاقپارات ءتىلشىسى.

قاتارداعى جاۋىنگەر دارحان مىرزابايەۆ 16 -مامىر تۇنگى ساعات 3:00 شاماسىندا قولعا ءتۇستى. ونى اسكەري پوليتسيا قىزمەتكەرلەرى سارى وزەك ستانساسىنان تاپقان.

«قاشىپ كەتكەن ازامات ءۇيىن ساعىنعاندىقتان وسىنداي قادامعا بارعانىن ايتتى. قازىر مىرزابايەۆ وتان الدىندا بورىشىن وتەپ جاتقان اسكەري بولىمشەگە جەتكىزىلدى. وعان قاتىستى قىزمەتتىك تەكسەرىس ءجۇرىپ جاتىر. سوعان سايكەس ءتيىستى تارتىپتىك شارا قولدانىلاتىن بولادى» دەلىنگەن ۇلتتىق ۇلاننىڭ باسپا ءسوز قىزمەتى تارتقان حابارلامادا.

ەستەرىڭىزگە سالا كەتەيىك، 14 - مامىر كۇنى الماتى وبلىسىنىڭ زارەچنىي اۋىلىندا ورنالاسقان 5574 اسكەري بولىمىنەن قاتارداعى جاۋىنگەر دارحان مىرزابايەۆ قاشىپ كەتتى. ونى اسكەردىڭ جەكە قۇرامى ىزدەپ، قولعا ءتۇسىردى. ايتا كەتەيىك، د. مىرزابايەۆ شىعىس قازاقستاننىڭ جارما اۋدانىنان اسكەرگە شاقىرىلعان بولاتىن.

اۆتور: سامال قابىشيەۆا