«نارتاي» فيلمىنىڭ ساۋندترەگىن مەن جازعان جوقپىن - مادەنيەت جانە سپورت ءمينيسترى
ورتالىق كوممۋنيكاتسيالار قىزمەتىندە ءوتىپ جاتقان بريفينگىدە ب ا ق وكىلدەرى مادەنيەت جانە سپورت مينيسترىنەن «نارتاي» فيلمىنىڭ ساۋندترەگىن جازعانى ءۇشىن قانشا قالاماقى العانىن سۇرادى. اقتوتى رايىمقۇلوۆا اۋەلى ءوزىنىڭ مينيستر لاۋازىمىمەن بىرگە عىلىمي جانە شىعارماشىلىق ىستەرمەن اينالىسۋعا قۇقىلى ەكەنىن ەسكە سالدى.
«مەملەكەتتىك قىزمەت تۋرالى زاڭنىڭ باپتارى بويىنشا مەملەكەتتىك قىزمەتشىلەر پەداگوگيكالىق، عىلىمي جانە شىعارماشىلىق جۇمىستارمەن اينالىسۋعا قۇقىلى. مىسالى، سىزدەر جۋرناليست بولىپ ءجۇرىپ، مينيسترلىككە تاعايىندالساڭىزدار نەمەسە مەلەكەتتىك قىزمەتكە كەلسەڭىزدەر، ءوز ماماندىعىڭىز بويىنشا جۋرناليستىك جۇمىسىڭىزدى توقتاتپايتىن شىعارسىزدار. سول سياقتى مەن مۋزىكا سالاسىنىڭ مامانىمىن»، - دەگەن مينيستر «نارتاي» فيلمىن تۇسىرۋشىلەردەن ەشقانداي قالاماقى الماعانىن مالىمدەدى.
«كومپوزيتور رەتىندە كوپ شىعارما جازدىم. ءبىراق «نارتاي» فيلمىنىڭ ساۋندترەگىن جازۋعا ۇسىنىس كەزىندە تۇسكەن بولاتىن. مەن ودان باس تارتتىم جانە قابىلدامادىم. سوندىقتان ەشقانداي قالاماقى العان جوقپىن، مۋزىكاسىن دا جازعان جوقپىن. بۇل - جالعان اقپارات»، - دەدى اقتوتى رايىمقۇلوۆا
اۆتور: ەسىمجان ناقتىباي
