فۋتبولدان قازاقستان كۋبوگىنىڭ ءۇشىنشى كەزەڭىنىڭ جەرەبەسى تارتىلدى
ايتا كەتەيىك، العاشقى ەكى كەزەڭنىڭ ناتيجەسىمەن جارىستىڭ اتالعان ساتىسىنا سديۋسشور 8№، «وڭتۇستىك اكادەميا»، «اقسۋ» جانە «ماقتاارال» كوماندالارى وتكەن بولاتىن.
ەندى ءۇشىنشى كەزەڭدە سديۋسشور 8№ مەن «وڭتۇستىك اكادەميا»، «ماقتاارال» مەن «اقسۋ» كوماندالارى ءوزارا جۇپ قۇرادى. ويىندار 21- مامىرعا جوسپارلانعان.
جەڭىمپازدار ءبىر ويىن قورىتىندىسى بويىنشا انىقتالادى. ول كۋبوكتىڭ توپتىق كەزەڭىنە قاتىسۋعا مۇمكىندىككە يە بولادى. توپتىق كەزەڭدە بارلىعى 16 كوماندا سىنعا تۇسەدى.
وندا پرەمەر-ليگادا وينايتىن 14 ۇجىم قاتارىنا ىرىكتەۋ كەزەڭىندە جەڭىمپاز بولعان 2 كوماندا قوسىلادى. وعان قاتىساتىن كلۋبتار ءتورت توپقا ءبولىنىپ، بارلىعى التى ويىن وتكىزەدى. ول 10- ماۋسىمدا باستالىپ، 15- تامىزدا مارەسىنە جەتەدى.
شيرەك جانە جارتىلاي فينال دا سول تارتىپپەن جۇرگىزىلەدى. شيرەك فينال 21-22- تامىز جانە 22- قىركۇيەكتە وتكىزىلەدى. جارتىلاي فينال 6-7- قاراشا جانە 20- قاراشادا بولادى.
فينال ءبىر عانا ويىننان تۇرادى. ويىن 28- قاراشاعا بەلگىلەنگەن.
ەسكە سالساق، 2- جانە 3- مامىر كۇندەرى پرەمەر-ليگا كوماندالارى اراسىنداعى ەل بىرىنشىلىگىنىڭ توعىزىنشى تۋرى وتكىزىلدى.